Aluga Ró Fery Tranship II Failla

Aluga Ró Fery Tranship II Failla
Why Not?
Husi: Rosário S. Araújo

STLNEWS.co – Leitores dahuluk liu hakarak hahu ho ezemplu badak ida kona ba Ministru Transporte Taiwan ho nia responsabilidade no integridade tomak husu resigna-an husi nia kargu nudar Ministru Transporte públiku tamba desastre komboiu nebe afeta ba ema nia vida iha Taiwan momentu neba, ilustrasaun seluk mak Ministru Transporte México nebe husu aviaun pasajeiro tenke estende nia viajen minute 23 hodi hein nia tama aviaun laran hafoin semo nufin sosiedade kestiona husi midia no Ministru né husu kedas resigna-an husi nia kargu nudar autoridade ida, leitores ezemplu istoria real iha leten refleta sintidu responsabilidade no integridade Estadu nian nebe sidadaun se deit tenke aseita ba kestaun no lamentasaun públiku nian nebe hatudu indisius forte ba abuzu konfiansa estadu nian nebe substitui no tutela iha sidadaun ida nia responsabilidade hodi jere diak asuntu komun públiku nian nebe sei labele prejudika no viola regras komun sira nebe estadu nasaun ida-idak opta, autoridade parte sira presiza kumprimenta ba medidas nasionál no internasionál sira hodi ivita nafatin ajente públiku sira labele monu ba kauza iregularidade hodi viola lei.

Esperiensia iha leten lori hikas ita atu hare saida mak mosu iha autoridade transporte maritima Timor Leste nia dezempeñamentu ba atribuisaun servisu sira mak liga oinsa fasilita, kontrolo no kria jestaun diak hodi ivita hases violasaun ba lei nebe bele hamosu diskrepansia nebe tau kauza ba fasilidade transporte maritima iha futuru estadu Timor Leste nian, husi perspetiva badak iha leten hakarak salienta katak Taiwan, México, Japaun no Korea nasaun ida mak valoriza tebes integridade nudar kultura diak iha sira nia estadu no sosiedade, autoridade sira halo jestaun ba transporte rihun ba rihun, maibe sira jere ho kapasidade hodi deskobre failansu sira entre transporte ida ba ida seluk mais profisionais no rigor la sikat leet interesses privadu ruma iha desisaun sira, jestor sira hatudu nia boa vontade de pertence estadu nian hodi soe no hases ambisaun no arogansia hotu, hatudu sira nia dedikasaun no maturidade nebe refleta servidor estadu mak laiha intensaun atu hetan lukru no oportunidade ruma iha situasaun saida deit, sira hatene no kunese diak sira nia povu no estadu, sira sukat sira nia nasaun nia rekursu, sira hatene komplesidade sosial nebe sira nia nasaun infrenta nuné sira tau iha prátika servisu no hatudu iha asaun real nufin povu fó konfiansa ba sira nia melhoramentu diak sira, ida né mak integridade estadu nebe as liu iha sosiedade ida, sira prontu servi ho fuan no laran ba nasaun no povu, sira rona povu nia lian nudar sujestaun diak ba sira nia bom servisu no komportamentu tamba né dala barak wainhira sira labele foti responsabilidade nebe todan ba nasaun ikus liu sira hili dalan resigna-an husi kargu, ida né nudar dalan diak nebe iha valor liu hodi hetan prefilesiu iha sosiedade, ida né mos mak dalan ne’ebé justu iha nasaun demokrasia sira, hili dalan ne’ebé la uza forsa tirania hodi manan poder publiku sira, Thomas Aquinas hatete katak, estadu nebe diak mak estadu nebe nia autoridade sira buka meius oioin hodi sutenta nia sosiedade iha asuntu bens estar, tranquilidade no liberdade iha moris, nuné estadu tirania mak estadu ida ke tau liu prekupasaun tomak ba nia an rasik no nia grupu sira nuné sai kauza ba sosiedade ida, hau hanoin katak dalan diak liu mak autoridade sira tenke kumprmenta ba konstituisaun nebe nudar mata dalan ba ita hotu, tuir Locke katak atu ivita labele mosu estadu absoluta no asegura moris sosiedade nian mak tenke fila fali ba jere poder sira tuir deit konstituisaun ho lolos, ida né nudar ejijensia ida mak kuaze sosiedade sira koalia no publika iha midia sira, publikasaun hirak né nudar forsa ida mak ema hotu espreza hodi hakarak hare ba seriedade makaer poder sira halo buat ruma hodi muda situasaun fragilidade sira hanesan nasaun infrenta daudaun ou hases tiha hanoin sosiedade nian hirak né

Aprende husi nasaun hirak temi iha leten desafia autoridade atu presta servisu sira ho rigor no prudente, kumprimenta ba ordem no lei, laiha tendensia atu halo abuzu hodi submete interesses sira mak lei la kunsidera, ita nia servi nudar lalenok ba jerasaun sira iha futuru oin mai, tamba né tenke hahu fó ezemplu diak atu oinsa sidadaun sira bele matenek no tau iha visaun atu lori Timor ba futuru, ita nia nasaun ladauk infrenta problema seriu liga ba asuntu ida né tamba ita foin mak hahu jere transporte maritimu ida to rua deit, maibe atu hatete deit katak ita hahu hatudu degradasaun moral nebe tun iha sosiedade nia matan nudar servidor ida mak laiha integridade no kapasidade, potensia hamosu injustisa no iregularidade ba desisaun sira hahu buras ba bebeik, leitores hau hanoin katak ita ladauk tarde atu hadia hahalok hirak né wainhira autoridade sira hakarak hatudu nia seriedade iha politika no jestaun, ita tenke aprende atu hatete buat nebe loos no deskobre buat nebe sala, ita tenke barani simu kritikas konstrutivu sira, ita tenke jentel halo introspeksaun ba ita nia an, ita mos tenke iha korajen atu husu an rasik hau né se loos, hau mai husi ne’ebe, aban bainrua hau fila ba nebe? perguntas hirak ne’e sei quia ita atu labele hela nafatin iha situasaun ida mak laiha serteza nudar nasaun soberano ida, ita hotu iha mehi rasik atu lori Timor Leste ba oin, tamba né labele empata no impede ema seluk nia mehi, maibe mehi diak atu muda povu no nasaun nia moris, laos mehi atu muda deit familia, grupu nia mehi, mehi ida agora né tulan iha autoridade sira nia kabas, saida mak autoridade nia mehi tenke realiza no refleta sintidu povu nian atu hasai povu husi mukit no kiak tuir heroi no matebian rai ida né nia mehi ba libertasaun patria.

Desenvolvimentu transporte Maritima mais importante no esensial ba hamoris ekonomia sosiedade nasaun nian, governu representa Ministeriu Transporte no Telekomonikasaun nudar viabilizador nebe tuir nia kna’ar mak halo supervisaun ba prosesu servisu APORTIL nebe tuir lei hetan kompetensia tomak hodi jere independentemente prosesu hotu mak liga ba asuntu transporte maritima ho nia jestaun tomak iha portu no maritima, signifika katak servisu APORTIL nian independente no laiha intervensaun polítiku nebe bele fó kauza ba sistema jestaun no administrasaun tomak mak instituisaun ida né jere hela.

APORTIL,I.P nudar institusaun publika ne’ebe maka halao ninia kna’ar bazea ba Dekretu Lei No.3/2003 kona-ba Administrasaun Portus Timor-Leste no Aprova Respetivu Estatuto. APORTIL,I.P nudar institusaun publika ne’ebe iha personalidade juridika, autonomia administrativa no finanseiru ho patrimoniu rasik, nafatin tutela no superintendensia ba Ministru Transporte Komunikasaun no Obras Publikas. Bazea ba Estatutu APORTIL,I.P iha artigu 1 (a) APORTIL,I.P nudar institute publiku pesoal koletiva ida ne’ebe maka iha direitu jurídika no autonomia administrativa no finanseira no iha patrimoniu rasik. Iha artigu 2 mos fo kompetensia ba APORTIL,I.P atu espesialmente aplika Estatutos no respetivus regulamentus. Ho baze legal ida ne’e maka APORTIL,I.P hamosu regulamentu internu hodi regula espesifikamente kona-ba tarefa husi kada diresaun.

Iha fulan Maiu 2021, mosu polemika bo’ot iha sosiedade nia le’et ne’ebe maka halo Sosiedade Sivil halo sira nia reportajem investigativu kona-ba polemika aluga ró subtitutu Tranship II, ne’ebe maka tuir Fongtil ninia pontu de vista katak viola lei no Parlamentu Nasional rasik iha sesaun plenaria, tanto husi bankada opozisaun no bankada apoiu governu rasik husu atu ministru hapara kontratu aluga ró subtitutu no membru Parlamentu Nasional husu atu CAC halo Prevensaun no Investigasaun ba kazu refere.

Iha parte ida né autoridade Transporte Maritima nebe tutela direita iha Ministeriu MTC nia okos hetan failansu nebe seriu tamba la kumprimenta ba kriteria jerais sira mak defini iha kompetensia APORTIL rasik, nuné bele iha potensia hodi hamosu frauda iha kontratu no diskobrimentu sira ba iregularidade tomak nebe sai diskrepansia boot iha autoridade transporte maritima nia jestaun sira, nudar jerente estadu autoridade sira lakon nia integridade no seriedade tomak hodi buka halo inspesaun antes ró né mai atu halo operasaun maibe iha tendensia tamba laiha seriedade iha prosesu inisial hodi halo inspesaun ida ke mais rigor ba ró refere, autoridade sira koko atu halakon konfiansa nebe dekretu lei né mensiona hodi halo kompetensia seluk husi lei né rasik, atu deskobre lolos risku sira iha ró ahi refere autoridade sira iha nia obrigasaun tuir lei hodi hahu hatudu indisius sira mak tenke apoiu estadu nia servisu diak hodi servi povu ho diak tuir prinsipiu komun nebe konsagra iha konstituisaun RDTL.

Leitores Governu hakerek planu nasional desenvolvimentu nebe sukat mos nia orsamentu sira iha planu orsamental tinan-tinan, nune’e tuir mai sei implementa tuir nia pakote programa sira, programa hirak ne’e nia sustentabilidade mak sei fasilita povu hodi bele hamoris ekonomia iha nasaun laran, prosesu aluga transporte hirak ne’e iha ligasaun metin ho planu nasional hirak ne’e, rekurzu nebe sai nudar xave hodi haforsa siklu ekonomia nasaun nian mak servente publiku sira nebe tenke servisu lolos no momos atu asegura sustentabilidade hotu bele lao diak to’o povu bele hetan moris diak, tamba né laiha razaun ba autoridade sira atu jere interesse privadu sira, hanoin nafatin katak bainhira jere sala lei sei vingula no kesi ita iha loron ikus, justifikasaun ba asuntu leis la tó deit koalia no provoka iha midia sira sein baze de dadus ruma, jerente sira iha CAC iha kapasidade naton hodi tetu no sukat buat hotu, tamba né diak liu ita koopera atu hadia bom komportamentu jestaun estadu nian duke ita forma pensamentu sira ke laiha fundamentu no la eduka publiku bele partisipa iha asuntu kombate korrupsaun iha Timor-Leste. Leolsae,16 Junu 2021

Opiniaun rasik no pesoal:

Hakerek nain servisu iha CAC
Karik iha hanoin ruma bele kontaktu ba
Hp: + 670 7732 6592
Email: [email protected]

LEAVE A REPLY

Please enter your comment!
Please enter your name here

NEWS UPDATE

Covid-19 Update (26 Jullu 2021): Pozitivu 6, Rekoperadu 45, & Ativu 656

DILI, STLNEWS.co - Loron 26 fulan Jullu liu Centro Integrado Gestão de Crises, Sala Situação (CIGC-SS) rejistu kazu pozitivu Covid-19 iha nain 6, Dili...

Demisaun Membru PNTL 3, PN Rekonese Bazeia Ba Regulamentu

DILI, STLNEWS.co - Parlamentu Nasional (PN) liu husi komisaun B neebe trata asuntu defeza seguransa no negosiu estranjeiru rekonese demisaun membru Polisia Nasional Timor-Leste...

Komisaun F Seidauk Aprova Projetu Lei Protesaun Ba Labarik

DILI, STLNEWS.co - Parlamentu Nasional (PN) liu husi Komisaun F trata asuntu Saude, Seguransa Sosiais no Igualidade Jeneru, seidauk aprova projetu lei protesaun labarik...
%d bloggers like this: