DILI, STLNEWS.co – Joven mak futuru nasaun nian, tanba nee buka haburas matenek hodi dezenvolve nasaun Timor Leste (TL) ba oin.
Kestaun nee hatoo husi Diretora Departamento Agropekuaria Fakuldade Agrikultura Universidade Nasional Timor Lorosae (UNTL), Brigida Antonia Correia ba STL liu husi telefone, Sabadu nee (08/04/2023).
Nia katak, joven mak kontinuador ba eroi sira nia luta iha prosesu dezenvolvimentu nasional, tanba nee haburas nafatin matenek iha idak-idak nia aan.
“Mensajen ba juventude Timorense katak, fiar aan nafatin, buka haburas matenek iha imi nia aan rasik, tanba ho matenek mak ita bele dezenvolve ita nia rai doben Timor Leste. Ema barak sofre, mate, luta ba ukun aan, maibe ita neebe sei moris agora nee mak tenki dezenvolve ita nia rai, hanesan mehi neebe ita nia saudozu sira entrega hela mai ita jerasaun kontinuadora. Tenki fiar aan nafatin. Jovens mak esperansa ba rai doben Timor Leste,” dehan nia.
Iha biban nee, nia mos husu ba feto sira iha Timor Leste nafatin barani lao ba oin, fiar aan, labele senti inferior iha mane nia leet, buka hariku aan ho siensia, buka matenek husi ema seluk nia esperiensia, ho nunee bele hatudu no asegura igualdade entre feto no mane tuir konstituisaun Republika Demokratia Timor Leste.
“Bainhira ita feto matenek sei hamutuk ho ita nia parseiru mane sira, bele hatutan dezenvolve ita nia rai doben Timor Leste, fiar aan lao ba oin,” katak nia.
Nunee mos eis Prezidente Rede Feto, Judite Dias Ximenes hatutan, joven mak futuru nasaun nia no joven mak kontinuador ba eroi sira nia ain fatin ba iha prosesu dezenvolvikentu nasional, tanba nee presiza kapasita aan ho matenek, hadook aan husi hahalok kriminozu sira.
“Nasaun ba oin iha joven sira nia liman, tanba nee agora aproveita matenek neebe iha hodi bele promove aan, nunee partisipa iha prosesu dezenvolvimentu nasional,” katak Judite.
Nia mos husu ba feto sira nafatin kapasita aan no partisipa iha formasaun oin-oin, nunee aumenta kapasidade bainhira hetan oportunidade hamutuk ho mane dezenvolve rai nee lao ba oin.
Nunee mos Diretora Fundasaun Haburas Moris, Emerenciana Nipo hatete, nasaun ba oin presiza ema hotu nia kontribuisaun tantu husi joven mane no feto, tanba nee keta lakon oportunidade, maibe presiza kapasita aan hodi kompete iha prosesu dezenvolvimentu nasional.
“Feto ho mane iha direitu neebe hanesan atu partisipa iha vida politika, ekonomia sosial no seluk tan, tanba nee presiza kapasita aan,” katak nia.
(eme)
