Aban CNRT Halao Konferensia Nasional Simu PD

DILI, STLNEWS.co – Aban dia 19 Junhu, Partidu Kongresu Nasional Rekonstrusaun Timorese (CNRT) sei halao konferensia nasional, hodi konkorda lao ho PD forma IX Governu.

Informasaun nee hatoo husi Xefi Bankada CNRT, Duarte Nunes katak, konferensia CNRT sei halao iha loron 19 Junhu, hodi simu PD halao koligasaun.

“CNRT nia konferensia halao hodi desidi legalmente konkorda ka simu koligasaun ho PD, ba formasaun IX Governu”, informa Xefi Bankada CNRT, Duarte Nunes ba STL iha Dili, Domingu (18/06/2023).

Nia hatete, konferensia nee parese sei halao iha salaun OKA, neebe sei partisipa mos husi munisipiu sira hotu i lidera husi Prezidente Partidu CNRT, Xanana Gusmão.

Tuir nia, atu halao iha sa oras, maibe fiksu ona iha loron 19 Junhu, atu halao lokraik ka dadersan nee iha ona ajenda, tanba konvite sai ona, maibe karik dadersan deputadu CNRT sira sei partisipa plenaria ikus iha parlamentu, depois lokraik mak ba partisipa.

Enkuantu ba kompozisaun meza, partidu 2 koalia ona, maibe informasaun seidauk fo sai, katak se mak atu ba lidera meza PN.

Neebe depois konferensia, iha dia 21 Junhu mak bele iha desizaun se mak ba Prezidente PN, tanba tenki hatama antes ba iha meza, 24 oras foin halao votasaun iha dia 22.

Formasaun ka postura governu, ate agora seidauk iha desizaun, tanba agora seidauk tempu atu koalia, bainhira hetan ona Primeiru Ministru indizitadu, foin bele desidi nia membru neebe atu servisu hamutuk ho PM atu koopera tuir regras, nunee susesu iha mandatu tinan 5.

Neebe postura governu kiik ka boot, nee hein PM mak sei fo sai.

“Kona ba Primeiru Ministru laiha ona diskusaun, hakarak ka lakohi Primeiru Ministru tenki Xanana, tanba nee promete ona ba povu iha fatin-fatin”, tenik Duarte.

Nunee mos Prezidente PD, Mariano Assanami Sabino hatete, konaba formasaun governu no kompozisaun meza seidauk desidi, tanba hein partidu 2 nee tur hamutuk mak desidi.

Konaba konferensia PD halao tiha ona iha semana kotuk hodi desidi legalmente koliga ho CNRT ba forma IX Governu. Enkuantu CNRT nia konferensia nee interna partidu idak-idak nian.

Tuir Assanami, informasaun sira iha publiku konaba kompozisaun meza, no lista membru governu nee informasaun deit, maibe partidu 2 seidauk desidi, hein forma tiha parlamentu, depois halao votasaun ba kompozisaun meza, foin tama ba formasaun governu.

Tanba nee, iha governu mos Primeiru Ministru indizitadu mak sei desidi, neebe ba PD laiha ezijensia, maibe saida deit mak fo ba PD prontu simu responsabilidade, tanba ba ukun nee laos oportunidade, maibe responsabilidade.

(gui)

LEAVE A REPLY

Please enter your comment!
Please enter your name here