DILI, STLNEWS.co – Reprezentante povu iha uma fukun Parlamentu Nasional (PN) liu husi Komisaun E neebe trata asuntu Infraestrutura, rekomenda ba Ministeriu Obras Publiku (MOP) tenki fo sansaun rigorozu ba kompanhia sira bainhira abandona sira nia servisu iha terenu.
Tuir Deputada Bankada FRETILIN, Maria Ana Bela Savio hatete, durante Komisaun E halo fiskalizasaun ba projetu reabilitasaun estrada iha Kaen-Laran ba Barike, Komisaun E observa katak, servisu ladun ho kualidade no komisaun mos nota durante ezekusaun servisu iha terenu laiha akompanhamentu husi tekniku kompanhia.
“Rekomenda ba MOP atu fo sansaun ho rigorozu ba kompanhia sira neebe mak abandona obra iha terenu, atu nunee labele impede dezenvolvimentu infraestrutura iha area rurais sira,” dehan nia liu husi plenaria iha PN, Tersa (02/08/2022).
Nia hatutan, nunee mos iha servisu munisipal, ba Obras Publika Munisipiu Manatutu atu orienta kompanhia ezekuta obra sira iha terenu ho kualidade, no mos oriente ba iha tekniku Obras Publika iha Munisipiu Manatutu atu halo monitorizasaun ho rigorozu.
Aleinde nee, Deputadu Bankada CNRT, Gabriel Soares hatete, difikuldades neebe mak Munisipiu Manatutu hasoru sai duni realidade, tuir kondisaun no situasaun neebe mak munisipiu nee hasoru.
(dom)
