GLENO,STLNEWS.co – Partido Socialista de Timor (PST) ho numeru sorteu 15, halo abertura mini kampanha iha Munusipiu Ermera, Kapital Gleno, no fo mos tomada da pose hodi hametin estrutura partidu nian iha baze, atu hakat ba eleisaun parlamentar, no iha kampanha nee PST aprezenta programa 3, hanesan subsidiu ba agrikultor, moderniza agrikultor no fo saham ka asaun ba trabalhador sira.
“PST hakarak abertura nia kampanha iha Munisipiu Ermera, tanba PST hatene katak, povu Ermera maioria moris hanesan agrikultor, tanba nee ita nia toos atu labele domina ema husi rai liur mak PST promete katak, karik hetan pozisaun iha eleisaun mai, PST hakarak moderniza setor agrikultor, fo subsidiu ba inan aman sira, tanba iha Munisipiu Ermera povu maioria hola parte iha vida agrikultor, no atu sai agrikultor tenki iha rai, tanba nee atu dehan ba povu Ermera katak, rai nee laos estadu nian, maibe povu nian, tan nee povu iha direitu atu halo toos kuda netik buat ruma,” dehan Prezidente PST Avelino Coilho, bainhira halo abertura ba mini kampania PST iha Munisipiu Ermera, Kapital Gleno, Kuartan nee (19/04/2023).
Nia katak, karik PST hetan pozisaun mak PST sei husu atu asumi knaar iha Ministeriu Agrikultura, atu nunee bele tau matan diak liu tan ba povu agrikultor sira, moderniza povu atu badinas produs, tanba Ermera konhesidu ho produsaun kafe, laos kafe deit, maibe Ermera riku tebes ho produtu sira seluk, tanba nee presiza dezenvolve i halo modernizasaun.
Tuir observasaun STL nian iha trenu haree katak, mini kampanha nee hetan observasaun husi CNE, STAE, Sosiedade Sivil, no seguransa masimu husi Polisia Nasional Timor Leste (PNTL).
(mad)
