DILI, STLNEWS.co – Koordenador Jeral Hametin Agrikultor Sustentavel Timor Lorosae (HASATIL), konsidera Timor Leste adere ba ASEAN sei iha impaktu, tanba daudaun nee seidauk kore aan husi dependensia produtu importasaun.
Lia hirak nee hatoo husi Koordenador Jeral Rede HASATIL, Gil Horacio Boavida, hanesan nasaun ida la taka dalan atu halo kooperasaun no adezaun iha relasaun bilateral no multilateral ho nasaun neebe deit.
“Agora kestaun ida konaba ekonomia, too agora ita sei depende makaas ba produsaun neebe mak importa husi liur, i ita nia fontes rendimentu agora mos uniku mak mina rai no gas deit, ita seidauk iha esforsu neebe mak signifikante hodi halo diversifikasaun ba iha ita nia fontes rendimentu,” dehan nia ba STL iha nia knaar fatin, Farol, Dili, (28/07/2022).
Nia fo ezemplu, investimentu ba iha setor produtivu no agrikultura industria seidauk bele asegura soberanu, nunee bainhira Timor adere ba ASEAN diak, maibe parese nia sei fo impaktu oituan mai Timor Leste , liu-liu liga ho situasaun neebe mak daudaun nee Timor Leste seidauk kore aan husi dependensia nee.
Iha fatin ketak, Diretor Ezekutivu FONGTIL, Valentin da Costa Pinto katak, daudaun nee FONGTIL ho ninia membru sira nia observasaun, nota iha ezistensia ASEAN nian neebe lao liu ona tinan 50, maibe iha nivel rejional iha situasaun neebe kontinua akontese mak dezigualdade.
(san)
