DILI, STLNEWS.co – Timor-Leste (TL) atu adere ba ASEAN presiza prienxe rekezitus sira neebe mak iha, tanba nee parte infraestrutura, ekonomia no politika presiza hadia.
Tuir Segundu Visi PN atual Deputadu Bankada KHUNTO, Luis Roberto katak, konaba TL atu adere ba ASEAN la fasil atu tama, tanba Timor foti referensia husi nasaun dezenvolvidu, neebe atu tama iha ASEAN nee xave mak setor ekonomia tenki lao diak, nunee mos estabilidade seguransa, estabilidade politika tenki diak, i hadia rekursu umanus neebe iha rekezitus barak prienxe.
“Nasaun barak apoia TL atu adere ba ASEAN, maibe nasaun balu mos sei duvidas, tanba dehan katak ekonomikamente, politikamente tenki hadia, laos nee deit, maibe haree mos ba edukasaun, saude agrikultura hodi hasae produsaun rai laran, atu nunee hadia diak hotu ona bele adere ba ASEAN”, katak Deputadu husi Bankada KHUNTO, Luis Roberto ba STL liu husi telefone Sabadu (15/04/2023) iha Dili.
Tuir nia, TL atu adere ba ASEAN nee fasil, maibe presiza haree ba futuru, presiza haree ba infraestrutura rai laran, hanesan estrada, bee moos seidauk hadia 100% oinsa mak atu adere ba ASEAN. Tanba presiza hadia tiha parte sira neebe iha atu prienxe rekezitus neebe mak iha.
(gui)
