DILI, STLNEWS.co – Autoridade de Inspeção e Fiscalização da Atividade Económica Sanitária e Alimentar (AIFAESA) kontinua kontrola sasan faan iha loja, liu-liu ba sasan hirak neebe liu prazu (expired).
Tuir Inspetor Jeral AIFAESA, Ernesto Monteiro katak, dezde inisiu 2016 kria AIFAESA nia papel ida mos kontrola ba sasan sira neebe expired, estragados, nunee mos sasan sira iha lisensa no laiha lisensa, laos nee deit, maibe ba mos sasan konstrusaun sira medidas laloos.
“Ami kontrola nafatin, maibe ami iha limita de tempu, no limitasaun ema, maibe ami nafatin halao knaar, karik komprador hetan sasan balu liu prazu, ami prontu simu keisa”, informa Inspetur Jeral AIFAESA, Ernesto Monteiro, ba STL, Kuarta (13/09/2023) iha Ministeriu Finansas Aitarak-Laran.
Nia dehan, bainhira komunidade hatoo keisa tenki hatudu faktus ka provas, nunee prosesu tuir dalan legal.
Tanba nee, prosesu ba sira neebe mak faan sasan expired, iha prosesu rua, ida krimi nomos kontradusaun, neebe prosesu kontradusaun, desizaun prosesu deit iha AIFAESA, bainhira prosesu tomak entrega deit ba juridiku, prosesu final tenki kona multa. Maibe karik dehan lakohi selu tanba ho razaun forti, ida nia rasik la kumpri desizaun inspektor Jeral, entaun nia iha direitu tomak atu lori prosesu ba oin.
Nunee mos Deputadu husi Bankada FRETILIN, Antoninho Sarmento katak, hanesan reprezentante povu husu responsavel AIFAESA nian, oinsa kontinua kontrolu ba merkadu sira, ba sasan neebe loja sira faan atu labele kontinua faan sasan expired hodi prezudika fali saude komunidade ka konsumidores sira.
Laos ba saude deit, maibe bele risku boot ba ema nia vida ka lakon vida.
Tanba nee, husu AIFAESA atu reforsa kapasidade kontrolu sasan iha merkadu, diak liu tan kontrola kada fulan-fulan hodi evita loja sira neebe faan sasan expired.
Nunee mos Xefi Bankada CNRT Duarte Nunes husu AIFAESA nafatin kontrola sasan iha loja sira neebe expired, atu labele faan hodi fo impaktu ba konsumidores.
Tuir nia, tanba konsumidores balu laiha konhesimentu ba lee, sira ba hanoin sosa deit, la haree ba data expired, depois sira konsumu bele risku ba saude.
(gui)
