DILI, STLNEWS.co – Pasiente balu lakon vida tanba laiha pasaporte hodi halo tratamentu ba liur, situasaun nee Ministru Justisa senti lamentavel tebes, sei esforsu atu tempu badak pasaporte bele too lalais iha Timor Leste.
“Ita lamentavel tebes, tanba situasaun nee akontese, governu, estadu fo nafatin atensaun boot tebes, atu bele dudu servisu nee lalais hodi bele responde ba situasaun pasaporte nian,” dehan Ministru Justisa Amandio Benevides ba jornalista sira iha Edefisiu Ministeriu Justisa, Tersa (01/08/2023).
Nia dehan, ekipa tekniku desloka ona ba iha loron 29 no iha loron 30/07/2023 nee sira komesa ona servisu halo instalasaun ho kompanhia iha neeba, hein katak tempu badak ministru mos sei desloka, atu halo aprovasaun final, nunee sira bele halo imprime, no la kleur tan ita bele hetan ona 16 mil pasaporte neebe hetan ona kontratu atu produs, maibe iha ratifikativu ita tau tan osan atu produs barak liu hodi responde nesesidade iha rai laran. Antes nee Ministru Justisa dehan katak, haruka ema nain 6, desloka ba Nasaun Finlandia ho objetivu atu observa direta prosesu no halo aprovasaun final produsaun pasaporte.
Ekipa nee kompostu husi Diretor Jeral Servisu Rejistu Notariadu, Tekniku Ministeriu Justisa inklui tekniku husi Ministeriu Negosiu Estranjeiru no Kooperasaun (MNEK), inklui MJ mos tama iha ekipa nee, no ekipa nee sei iha Finlandia durante loron 13. Nunee, hanesan Ministru Justisa hetan ona orientasaun husi Xefi Governu, Xanana Gusmao, atu ba Finlandia hodi halo observasaun direta ba prosesu produsaun pasaporte. Tanba nee, tuir MJ, kontratu ba produsaun pasaporte antes nee governu anterior selebra ona ho Empreza Visi Mitra no Thales hodi halo produsaun ba pasaporte. No pasaporte neebe sira atu produz tuir kontratu neebe mak iha ba tinan ida nee hamutuk 16.000 ho osan total US$ 220.000, maibe hanoin la too. Tanba nee, Ministru Justisa planea sei ajusta iha orsamentu retifikativu tinan nee ba planu akizisaun pasaporte rihun 60.000 tan. Atu bele atinje numeru kaderneta passaporte 72.0000, hodi bele responde ba nesesidade nebee iha.
(ter)
