Anula Estatutu Atauru Ba Munisipiu, Konsulta Antes Implementa

DILI, STLNEWS.co – Bankada CNRT iha uma fukun Parlamentu Nasional (PN) afirma, kompromisiu IX Governu atu anula estatutu Atauru nudar munisipiu, nee kompremitidu kedas mai husi Primeriu Ministru molok simu pose iha dia 01 Julhu 2023.

“Anula estatutu Atauru nee kompromisu ida IX Governu, neebe iha dia 1 Julhu bainhira simu pose diskursu PM nian indentifika asuntu prioridades sira neebe atu halo iha governasaun ida nee, inkluindu indentifika ona atu anula estatutu Atauru nia nudar munisipiu,” dehan Visi Prezidente Bankada CNRT, Deputadu Patrocino Fernandes ba jornalista sira iha PN, Kuarta (05/07/2023).

Nia dehan, bankada opozisaun atu konkorda ka la konkorda, pesoalmente hanoin nee normal, tanba alterasaun ba lei divizaun administrativa hodi hasae estatutu Atauru ba munisipiu nee mai husi bankada governu FRETILIN duni, neebe ba biabilizadu iha tempu neeba.

Nia afirma, maibe politika IX Governu ba bankada governu neebe iha PN ninia pozisaun mak kompremitidu atu sustenta politika hotu-hotu iha IX Governu nian para fo susesu.

Nia tenik, tanba nee ba deklarasaun husi Bankada FRETILIN atu konkorda ka lae nee normal, rajaun anula estatutu Atauru, tanba iha kondisoens lubuk la fo razaun para atu hasae estatutu Ataturu ba munisipiu.

Nia esplika, hanesan kondisaun infraestrutura, instalasaun edifisius sira, rekursus inklui sira nee hotu mak IX Governu tau ba asaun nudar politika iha governu ida nee nian ho razaun identifika nudar prioridade.

“Tanba nee, hau hanoin bankada governu iha dever atu halo politika hotu-hotu hodi sustenta, no fo apoiu ba politika IX Governu nian,” sublina nia.

Nia sublina, sedu liu atu dehan povu Atauru konteti loos atu sai munisipiu, tanba pelumenus alterasaun lei nee hasae estatutu Atauru ba munisipiu, proporiu pesoalmente seidauk rona direta husi povu Atauru katak sira konteti loos.

Nia haktuir, mais inprinsipiu povu Atauru ninia espetativa nee mak atendimentu publiku ba povu nia moris diak, neebe laos estatutu nudar munisipiu nee mak atu bele fo resposta ba povu nia preokupasaun konaba povu nia moris diak, neebe sedu liu atu dehan povu Atauru konteti atu ba munisipiu.

Nia hatutan, buat neebe halo povu konteti ba estadu mak asaun governu nian atu lori asistensia publika ba povu, hanesan estrada, bee moos, eletrisidade, saude, eskola no dezenvolvimentu ekonomiku, bainhira halo povu asesu diak ba atendimentu publiku, ida nee mak halo povu kontenti.

Entretantu, Deputadu Bankada FRETILIN, Antonio Calau dehan, liga ba deklarasaun PM nian katak, atu anula estatutu Atauru ba munisipiu, preokupasaun ida nee pesoalmente simu telefone katak, agora daudaun komunidade Atauru kontenti ho ezistensia Munisipiu Atauru no governu halo ona investimentu lubuk ida iha neeba.

“Se ita anula ka retira Munisipiu Atauru, signifika katak ita fila ba kotuk. Tanba nee, hau propoin ba PPN atu halo konsulta ida ba Atauru ho Oekusi, antes IX Governu atu implementa ninia planu ida nee,” dehan nia.

(dom)

LEAVE A REPLY

Please enter your comment!
Please enter your name here