DILI, STLNEWS.co – Prezidente Autoridade Rejiaun Administrativu Espesial Oekusi Ambeno (PA-RAEOA), Arsenio Bano deklara, nia parte hein deit, bainhira Primeiru Ministru Kay Rala Xanana Gusmão hakarak ezonera nia husi Prezidente Autoridade RAEOA.
Lia hirak nee Arsenio Bano deklara relasiona ho Bankada Partidu CNRT neebe husu Primeiru Ministru Kay Rala Xanana Gusmão atu ezenora nia husi Prezidente Autoridade RAEOA foin lalais nee.
“Konaba figura foun ba RAEOA nee husu deit ba governu sentral, liu-liu Primeiru Ministru Kay Rala Xanana Gusmão. Hau nee estadu selu atu servi estadu nee, kuandu Primeiru Ministru haruka karta husu hau deskansa mak hau sei deskansa,” dehan nia ba jornalista sira iha Palasiu Governu, Kinta nee (21/09/2023).
Nia hatutan, bainhira xefi governu seidauk ezenora nia husi Prezidente Autoridade RAEOA mak nia sei kontinua servisu, tanba estadu selu nia atu servi nasaun nee.
“Hau seidauk simu karta ezonerasaun, fulan-fulan hau labele simu gazi buta, entaun hau tenki kontinua servisu, se lae imi kritika fali hau, neebe seidauk simu karta ezonerasaun hau tenki servisu nafatin, tanba ami iha projetu hamutuk 99, nee la fo tempu ba hau atu deskansa,” tenik nia.
Maski nunee, nia dehan, bainhira Primeiru Ministru ezonera nia husi Prezidente Autoridade RAEOA mak nia prontu koopera.
“Ema ruma mak mai troka hau, hau sei entrega didiak hodi kontinua servisu neebe mak iha,” hakotu nia.
(alb)
