Assanami: 30 De Agosto Reflesaun Ba Povu Nia Barani

DILI, STLNEWS.co – Visi Primeiru Ministu Mariano Assanami Sabino hatete, 30 de Agosto loron neebe importante, hodi halo refleksaun fila fali ba povu nia barani hodi vota ba ukun rasik aan.

II Visi Primeiru Ministu, Mariano Assanami Sabino hatoo lia hirak nee ba STL bainhira halo lansamentu serimonia asina memordum de entendimentu entre Governu Timor Leste ho parseiru estratejiku sosiedade sivil iha salaun CNE, Kaikoli, segunda (28/08/2023).

“Ba inan aman sira hotu, 30 de Agosto nee selebrasaun ida ba refleksaun neebe mak ita hotu ho aten barani ita hili ba ukun rasik aan, ita hotu tenki esforsu nafatin ho espiritu asuwain ita tenki fo kontinuidade ba dezenvolvimentu ida nee, para atu realiza duni mehi lutador sira nia, ita nia mehi rasik,” dehan Visi PM.

Visi PM mos husu ba sidadaun hotu, ho refleksaun 30 de Agosto nafatin hamutuk hodi luta ba dezenvolvimentu, nunee lori rai nee ba oin ho prosperu.

“Ohin ita tenki hamutuk kompromitidu dala ida tan, Timor ita nia rai, ita hotu hamutuk atu lori Timor ba oin,” dehan Visi PM.

Iha sorin seluk, Diretor ezekutivu Forum Organizasaun Naun Governamental Timor Leste (FONGTIL), Valentim da Costa Pinto hatutan, 30 de Agosto hanesan odamatan ba autodeterminasaun Timor Leste nia.

Diretor dehan, ambiente selebrasaun 30 de Agosto kada munisipiu kuaze iha feira oin-oin neebe halo hodi fo oportunidade ba komunidade sira festeza loron boot ida nee.

“Selebrasaun 30 de Agosto hanesan odamatan neebe determina autodeterminasaun Timor nia, entaun konvida sidadaun hotu tenki orgulhu ba ida nee, no governu mos tenki hanoin ona katak, 20 ital ona ita selebra ida nee, ita tenki hakonu ona sidadaun sira nia nesesidade, tanba ukun aan ida nee ita selu ho karun, ema hotu nia sakrifisiu, entaun ita tenki valoriza ida nee liu husi governu nia intervensaun hodi eleva didiak ita nia dezenvolvimentu no ema hotu orgulhu,” katak Diretor FONGTIL.

(eme/don)

LEAVE A REPLY

Please enter your comment!
Please enter your name here