DILI, STLNEWS.co – Asosiasaun HAK hamutuk ho parseiru sira realiza workshop nasional hodi asegura sustentabilidade sistema Bee, Saneamentu no Ijiene rural.
Tuir Diretor Ezekutivu Asosiasaun HAK, Sisto dos Santos hatete, workshop nasional nee hamutuk ho parseiru sira, realiza auditoriu sosial ba asuntu Bee Saneamentu no Ijiene (BESI) iha munisipiu rua, Likisa no Manufahi, neebe foku liu ba asuntu Kartaun Pontuasaun Komunidade(KPK).
“Komunidade sira mak fo valor ba esforsu neebe halo,, dezde ita nia parseiru dezenvolvimentu nasional hamutuk ho governu no SAS kanaliza hela bee moos ba ita nia komunidade sira iha area rural,” dehan nia ba jornalista iha salaun CNE Kolmera, Dili, Kuarta nee (27/07/2022).
Nia hatutan, iha KPK nee ho sistema bee hamutuk 41, iha Munisipiu Likisa no Manufahi, husi nee HAK observa katak, iha 34 sistema bee mak lao efetivu, maibe iha dezafiu neebe mak sistema sira seluk hasoru hamutuk 7 labele lao i paradu, tanba sira rasik laiha kbiit atu rezolve.
Iha fatin hanesan, Prezidente Komisaun Ezekutivu Bee Timor-Leste, Empreza Publika (BTL,EP), Carlos Peloi dos Reis haktuir, komunidade iha area remotas durante nee seidauk asesu bee no saneamentu ho diak.
“Ita akompanha iha tinan barak, bee no saneamentu nee setor importante ba moris diak liu-liu atu hadia saude publika nian, maibe ita haree investimentu neebe ita halo iha setor ida nee la masimu, tanba ita nia governu iha minimu opsaun no buat barak mak presiza ita nia governu tenki halo,” hakotu nia.
(san)
