ASSEPPOL Halo Enkontru Ho PR Horta

DILI, STLNEWS.co – Asosiasaun Dos Ex Priozineiros Politiku Timor Leste (ASSEPPOL) hasoru malu ho Prezidente Republika Jose Ramos Horta, hodi aprezenta pontus rua ba iha Xefi Estadu.

Bainhira remata hasoru malu, Prezidente ASSEPPOL, Jasinto Alves  ba jornalista sira iha palasiu Prezidente Bairo Pite Nicolao lobato Kuarta (23/08/2023) hatete, sira hasoru prezidente tanba antes nee sira mak hatoo karta ba Xefi Estadu.

“Ami husi ASSEPPOL ohin lokraik hasoru malu ho Prezidente Republika, depois de Prezidente Republika simu ami nia karta neebe mak dirizi mai iha prezidente hodi aprezenta pontus rua importante, ida nee mak ohin prezidente konvida ami mai para hatoo kontiudu husi karta ami nia hodi diskuti,” dehan nia.

Prezidente ASSEPPOL dehan, karta nee nakloke ba publiku i ASSEPPOL publika tiha ona, no karta nee aprezenta pontu rua, pontu ida konaba fundadores barak nasaun nia neebe durante prosesu ba luta harii estadu ida nee sira hetan akuzasaun hanesan traidor tantu kuadrus superior, kuadru mediu, kuadru imperior, hanesan mos komandante FALINTIL.

“Ami mai hatoo ba prezidente katak, tenki iha pronunsia ba ema sira nee, i husi ASSEPPOL nia hanoin katak tenki iha prosesu judisial ida para komprova nee los ka lae, maibe ami hanoin katak difisil ona ba estadu atu hetan indisiu, tanba kleur ona, barak mos mate ona, no segundu haree norma juridiku neebe laiha retroatividade, tanba nee mak ami hanoin estadu mak tenki pronunsia politikamente ba iha asuntu sira nee,” katak nia.

ASSEPPOL nia posizaun katak, labele husik nafatin ema sira nee iha klima ida neebe akuzadu, neebe laiha serteza ba ida nee, ida nee mak sira mai aprezenta ba iha prezidente.

“Ami mos sujere senhor prezidente konsulta mos ho membru komite central neebe sei moris hela, buat sira nee hotu akontese iha prosesu luta ba harii estadu ida nee, komu estadu ida nee hamriik ona, fo ona garantia ba sidadaun hotu-hotu konaba direitu, buat sira nee hotu, tanba nee mak ami mos husu katak, tenki iha pronunsiamente ba ema sira nee hotu, PR hanesan jerasaun ida fundador nasaun ida nee nia, iha liu autoridade moral, politiku, atu bele koalia konaba asuntu ida nee,” katak nia.

Nia hatutan, segundu pontu neebe mak sira aprezenta ba PR mak konaba rekonsiliasaun, katak tuir CVAR nia halao iha mandatu ida 2001 numeru 10 neebe defini konaba nia konseitu rekonsiliasaun nia ho mekanizmu i prosedimentu ida nee saida mak tenki halao bainhira halo rekonsiliasaun komunitaria.

“Ami dehan deit ba senhor prezidente katak, buat sira neebe mak ligadu ho konflitu nee ami sujere ba prezidente katak atu hakotu sempre iha desizaun ida legal ba ida nee para labele hamosu fali duvida oin oin, ami mos husu katak tanba buat ida krime kontra humanidade nee nia ligasaun ho ema nia sentimentu pesoal dala ruma lori implikasaun politika etika, ami husu ba prezidente atu tetu buat sira nee hotu didiak,” katak nia.

Prezidente Republika Jose Ramos hatete, nia rona opiniaun hotu neebe mak hatoo husi Asosiasaun Eis Priozineiru Politiku, maibe sei halo konsulta ida alergada ho reprezentante povu iha uma fukun parlamentu, deputadu sira, ho governu ho NGO ka sosiedade sivil sira hotu depois mak prezidente sei foti desizaun.

(eme)

LEAVE A REPLY

Please enter your comment!
Please enter your name here