Auditoria Sesta Bazika-US$ 200 Kompromisu CNRT, Governu foun Sei Halo Avalisaun

DILI, STLNEWS – VIII Governu Konstitusional nia progarama sesta bazika ho subsidiu US$ 200 neebe implementa, maibe mosu reklamante barak mak seidauk simu sira nia direitu refere, tanba nee sai kompromisu ida ba Partidu CNRT atu halo auditoria.

Kestaun nee hatoo husi Xefi Bankada CNRT, Deputadu Duarte Nunes ba STL iha PN, Dili, Kuarta (31/05/2023).

“Auditoria nee kompromisu ida partidu nian neebe koalia ona iha kampanha katak, nia sei halo auditoria ba iha sesta bazika ho US$ 200, para ita haree took osan neebe aloka ba nee, ba duni povu ka lae, benefisiariu ka lae,” dehan nia.

Nia informa, tanba parlamentu aprova iha nee osan hira mak atu lori ba ema hira no iha familia ida, entaun sei haree fila fali took osan nee ba duni ka lae.

“Governu foun mai sei halo avaliasaun, buat nee iha nesesidade atu kontinua ka lae, tanba nee governu nia programa,” hatete nia.

Nia sublina, maibe fiar iha kompromisu ka promete ona atu halo auditoria, neebe governu foun mai sei halo, se laiha mak parlamentu bele buka dalan ba iha neeba.

Nia hatutan, tanba nee programa governu nian neebe governu mak mai aprezenta nia programa hodi bele hetan aprovasaun iha PN, hanesan deputadu labele adianta buat ruma.

“Entaun governu foun mai mak jornalista sira bele husu programa sesta bazika ho subsidiu US$ 200, IX Governu sei kontinua programa nee ka lae, se karik kontinua nia modelu nee halo nusa, nee governu mak hatene,” hatutan nia.

Nia hatete, maibe ba deputadu sira sei deskobre, serake iha relevansia no iha nesesidade duni atu aprova programa governu nian nee, depois mak haree.

(gui)

LEAVE A REPLY

Please enter your comment!
Please enter your name here