DILI, STLNEWS.co – Hafoin simu titlu Honoris Causa husi American University Of Phnom Penh (AUPP) Kambodia, Lider Karismatiku Kay Rala Xanana Gusmão sei hasoru malu ho Primeiru Ministru Kamboja, Hun Sen, governante lubuk ida iha Kamboja no Sekretariu Jeral ASEAN nian, hodi diskuti konaba adezaun Timor Leste ba ASEAN.
“Nia “Kay Rala Xanana Gusmão” simu konvite husi Universidade AUPP, Xanana hanesan belun diak husi Primeiru Ministru Hun Sen, entaun Primeiru Ministru mos hasoru nia, ohin (05/05/2023) abertura Sea Games iha neeba, kuaze lider importante husi ASEAN iha neeba no sei hasoru malu iha abertura nee,” hateten Sekretariu Jeral CNRT Francisco Kalbuadi Lay, iha Sede Nasional Partidu CNRT, Sesta nee (05/05/2023).
Mezmu iha ajenda politika neebe okupadu tebes-tebes, tanba nee Lider Nasional Kay Rala Xanana Gusmão obriga aan hakat sai husi Timor Leste atu ba simu Honoris Causa husi American University of Cambodia.
Atribuisaun Doutor Honoris Causa sei akontese iha Sabadu semana nee, iha American University of Kamboja. Aleinde nee Xanana Gusmão mos sei partisipa iha abertura Sea Games iha Phenom Penh iha neebe atleta Timor oan nain 93 husi modalidade karate, taekwondo, boxe, atletizmu, ciclismo, futebol, badminton, tenis, natasaun, elektroniku, halterofilismo no voli praia mos partisipa.
Tuir Planu, Xanana Gusmão sei fila hikas mai Timor-Leste iha loron 8 fulan Maiu, hodi kontinua kampanha iha Munisipiu Aileu too remata. Iha biban nee lider Partidu CNRT nee mos hameno hela ba Sekjer Partidu CNRT atu informa ba militante no simpatizantes sira atu kontinua kria pas no dame iha kampanha.
(gui)
