DILI, STLNEWS.co – Povu Timor Leste komesa idak-idak hasae bandeira partidu politiku ninian, maibe votus mak sei deterima.
Informa Veteranus Ete-uco Guterres ba STL iha nia knaar fatin Balide, Dili, Segunda nee (10/04/2023).
“Bandeira nee ita bele hasae, mais agora ema nia laran nee se mak hatene. Orsida nia bele hasai bandeira ida nee, mais too eleisaun vota ba bandeira seluk ita la hatene,” nia dehan.
Nia esplika, povu hasae bandeira iha idak-idak nia uma oin, maibe too eleisaun povu sei deterima sira nia desizaun, tanba nee atu halo prediksaun nee susar.
“Hau haree iha Facebook katuas ida dada sae tiha bandeira ida seluk, maibe nia dehan hau hasae bandeira maibe hau vota ho konsiensia,” nia informa.
Nia deklara, partidu politiku nian obrigasaun tenki prepara povu tuir manifestu politiku idak-idak nian, oinsa para atu hadia sira nian moris.
Iha fatin hanesan, Akademista UNTL Gildo dos Santos hatete, povu iha munisipiu no iha kapital Dili komesa dada ona idak-idak nia bandeira partidu politiku, maibe iha Kapital Dili Bandeira CNRT mak maioria.
“Ita haree povu dada bandeira tuir idak-idak nian partidu, maibe ita haree Bandeira CNRT iha area Tasi Tolu tesik mai Komoro nomos too iha Bekora Bandeira CNRT mak domina, mais ita nia votus mak determina, ita labele sik ema nia laran,” nia tenik.
Nia informa, bandeira hasae ona, maibe partidu politiku sira mak akompanha tenki koalia programa, laos konta istoria, tanba povu hakarak dezenvolvimentu.
Observasaun STL iha terenu, populasaun iha Kapital Dili komesa hasae idak-idak nian bandeira partidu politiku hodi hasae Bandeira CNRT, Badeira Partidu Libertasaun Popular (PLP), Partidu Liberta Povu Aileba (PLPA), Partido do Desenvolvimento Nasional (PDN), Partidu Demokratiku (PD), no Bandeira Partidu Kmanek Haburas Unidade Nacional Timor Oan (KHUNTO), Partido os Verdes de Timor (PVT), Partidu Uniaun Demokratika Timorense (UDT), Partidu da Unidade de Dezenvolvimentu Demokratiku (PUDD), nomos Partidu Frente FRETILIN nomos bandeira sira seluk neebe povu dada iha idak-idak nian uma oin mos uma letan.
(jen)
