Bankada CNRT Husu Governu Labele Apoiu Finanseiru Ba ONG

DILI, STLNEWS.co – Deputadu husi Banka CNRT iha Parlamentu Nasional (PN), Natalino dos Santos husu ba IX Governu labele fo apoiu finanseiru ba Organizasaun Noun Governamental (ONG), sira hatene kritiku deit, maibe la analiza situasaun.

Deputadu Bankada CNRT, Natalino dos Santos rekomenda governu, liu husi apoiu sosiedade sivil no auditoria sosial (SASCAS) halo avaliasaun hafoin fo apoiu ba sosiedade sivil sira.

“Hau rekomenda ba governu liu-liu SASCAS atu fo avaliasaun ba NGO sira neebe kritika hetan ona apoiu internasional, diak liu fo ba NGO lokal sira ou nomos organizasaun sira hanesan mana kasian (Veterana Madalena Bidau Soares ‘Kasian’) ninia inisiativa loke eskola,” hatete Deputadu Natalino dos Santos liu husi debate Orsamentu Jeral Estadu 2024 iha Parlamentu Nasional, Segunda nee (18/12/2023).

Tanba nee, nia dehan, labele fo ba ONG neebe buka insulta ka kritika ba orgaun soberanu deit, maibe la analiza situasaun neebe akontese.

Nunee nia parte husu ba governu, karik apoiu finanseiru ruma labele fo ba sosiedade sivil, diak liu grupu rezistensia sira iha inisiativa no forma grupu nomos kria kampu trabalhu, nunee hadia joven sira nia moris.

Resposta ba asuntu nee, Primeiru Ministru InteriƱu, Mariano Assanami Sabino hatete, governu sei la haree sosiedade sivil neebe kritika makaas ka la kritika, nee papel sosiedade sivil nian hodi kontrolu atividade governu nian.

“Apoiu ba sosiedade sivil sira, ita la halo hanesan sosiedade sivil neebe kritika makaas ita lalika apoiu ka. Sosiedade sivil nia papel duni mak atu halo kritika, halo kontrolu, importante mak iha nasaun neebe ba sivilizasaun, ita nia kontrolu nee laos trata malu ka ataka malu ka liafuan sira neebe violetiku. Nee lalika mais funsaun,” dehan Visi PM, Mariano Assanami Sabino hatan iha debate OJE 2024 iha PN.

Tuir Assanami, governu sei la haree ba kritiku sira, maibe haree NGO sira mak haree ezekusaun no implementasaun governu nian. Importante lao tuir promesa neebe ema hotu hakarak tuir politika saudavel, bele lao diak ba oin, tuir konstrusaun estadu nomos sivilizaun neebe loos.

“Entaun, ita labele uza liafuan trata malu ka ataka malu, maibe uza liafuan neebe adekuadu ba prosesu konstrusaun estadu neebe diak,” nia hakotu.

(EST 2)

LEAVE A REPLY

Please enter your comment!
Please enter your name here