DILI, STLNEWS.co – Deputadu husi Bankada Governu oreokupa tebes ho komunidade barak neebe too oras nee seidauk simu ai haan sesta bazika, tanba haree ba mandatu governu ida nee sura deit ona fulan, oinsa atu solusiona problema ida nee.
Kestaun nee fo sai husi Visi Prezidente Parlamentu Nasional, Deputadu Luis Roberto husi Bankda KHUNTO liu husi sesaun Plenaria Segunda nee (03/04/2023) iha Parlamentu Nasional.
“Relatoriu neebe mak governu aprezenta mai dehan, distribuisaun sesta basiku ba segundu faze nee alkansa ona 90%, maibe bainhira ita tun ba iha baze rona katak, ema barak mak seidauk simu, aat liu tan ema barak halo reklamasaun no seidauk simu too agora, i aat liu tan mak iha fatin balun distribuisau sesta bazika seidauk tama too ohin loron, maibe haree ba relatoriu dustribui ona 90%, tan nee presiza esplokasaun,” dehan Deputadu Bankada Governu, Luis Roberto.
Nia katak, laos sesta bazika deit mak povu preokupa, maibe subsidiu US$ 200 uma kain barak mak seidauk hetan too agora, i aat liu tan sira neebe tama iha faze reklamansaun mos seidauk hetan US$ 200 nee, haree ba mandatu governu da-8 nee nian sei hotu iha fulan ida rua mai nee, maibe servisu sira neebe lao dezde tempu anterior nee seidauk alkansa hela deit no durante nee membru governu sira neebe tuur iha neeba nee halo saida deit.
Iha fatin hanesan, Deputada Maria Angelina husi Bankada PLP hatutan, distribuisaun ai haan sesta bazika nee, povu iha Postu Natarbora mos seidauk simu too agora, la hatene nia problema lo-l0os nee iha neebe.
“Hau husu ba governu atu toma atensaun ba povu sira neebe seidauk simu ai haan sesta bazika nee, tanba nee povu nia direitu no orsamentu alokadu tiha ona, direitu povu nian atu hetan sesta bazika no subsidi US$ 200 nee,” dehan deputada nee.
Hatan ba preokupasaun nee Ministru Asuntu Parlamentar i Komunikasaun Sosial, Francisco Jeronimo hateten, liga ho ai haan sesta bazika, nia sei hatoo ba iha ministeriu relevante atu rezolve lalais tiha, tanba nee povu nia direitu duni.
(mad)
