DILI, STLNEWS.co – Sura deit ona fulan hakat ba festa demokrasia ka eleisaun parlamentar, tanba nee presiza alarga ona kondisaun estrada sira neebe aat, atu nunee aban bainrua bele fasilita servisu Servisu Tekniku Administrasaun Eleitoral (STAE) lori urnas ba too area remotas.
Preokupasaun nee hatoo husi reprezentante povu iha uma fukun Parlamentu Nasional, Deputudu Jose Paiseco liu husi sesaun Plenaria Tersa nee (14/03/2023) iha Parlamentu Nasional.
“Sura deit ona fulan ita sei hakat ba eleisaun parlamentar, tanba nee husu ba governu atu hadia estrada sira neebe mak aat ona, ho nunee fasilita governu no povu too iha sentru votasaun,” kestiona Deputadu FRETILIN nee.
Nia afirma, kondisaun estrada iha Aileu, liu-liu Remesiu aat tebes, no iha fulan kotuk ba Ministru Obras Publiku dehan, projetu nee tama ona iha tenderizasaun, maibe too agora seidauk iha serteza ruma, estrada la diak sei difikulta atividade hotu iha eleisaun mai, tan nee diak liu hahu agora haree tiha kedas.
Iha fatin hanesan, Deputada Antoninho Goncelves (Kalohan) hateten, kondisaun estrada neebe aat laos iha Aileu deit, maibe kuaze iha munisipiu sira seluk mos hasoru problema hanesan.
“Los duni tinan ida nee hanesan tinan politiku, tanba nee la kleur ita sei ba eleisaun parlamentar, tan nee estrada neebe aat tenki hadia daudaun ona,” dehan deputadu nee.
Nia katak, estrada iha area remotas sira nee barak mak rai lori halai, tanba nee aat los tiha ona, presiza atensaun husi governu.
(mad)
