DILI, STLNEWS.co – Relasiona ho informasaun neebe mak viral iha semana kotuk liu ba, katak stok mina kombustivel laiha. Husu ba publiku lalika fiar, tanba informasaun sira nee hoax (falsu).
Informasaun nee hatoo husi Sekretariu Estadu Komunikasaun Sosial (SEKOMS), Mericio Akara, bainhira hatan ba preokupasaun deputadu sira nian iha Parlamentu Nasional (PN), Tersa nee (02/08/2022).
“Liga ba espekulasaun konaba mina kombustivel iha rai laran hotu, nee hoax, tanba nee Primeiru Ministru (PM) depois hasoru Prezidente Republika (PR) mai halo kedas deklarasaun, fo hanoin ba publiku atu lalikan preokupa, inklui mos fo hanoin kedas ba PR atu lalikan preokupa, tanba informasaun nee hanesan hoax ka lia falsu,” klarifika Mericio iha parlamentu.
Nia hatete, relasiona ho informasaun hoax nee, PM mos halo ona deklarasaun ba publiku, katak konaba stok mina iha rai laran nee laiha problema.
Nunee mos Deputada husi Bankada PLP, Domingas dos Santos hatete, informasaun mina laiha, komisaun C ba halo ona fiskalizasaun haree mina sufisiente i iha roo mos hatun tan mina, karik grupu balu halo rumoris tanba la sufisiente ho subsidiu nebee mak fahe.
(gui)
