DILI, STLNEWS.co – Kompanhia husi Brunei Darusalam hakarak halo investimentu ba hotel no turizmu iha Timor Leste, maibe sei hein akordu husi governu rai rua nian.
Lia hirak nee hatoo husi Embaixador TL ba Brunei Darusalam, Abel Guterres ba jornalista sira, bainhira remata hasoru malu ho Prezidente Republika Jose Ramos Horta iha Palasiu Prezidente Bairo Pite, Tersa (10/10/2023).
Embaixador nee hatete, ohin nia mai akompanha kompanhia husi Brunei neebe sei mai halo investimentu iha Timor Leste, no sira mai dala 4 ona.
Nia hatete, ohin hasoru malu ho prezidente hodi fo mos Brifing ba prezidente konaba ninia vizita estadu ba iha Brunei fulan tuir mai.
“Investimentu iha area turizmu nee tenki halo Hotel Aeroportu, liu liu zona Baukau, inklui Dili mos halo dezenvolvimentu iha tasi ibun no buat seluk neebe Governu TL hakarak sira prontu halo,” dehan nia.
Nia hatutan, agora sira iha hela preparasaun atu halo akordo ho Governu Timor Leste, atu halo investimentu.
Nia haktuir tan, Brunei sei iha planu atu halo investimentu iha area turismo iha area oin oin hanesan hotelaria, restorante, nunee mos hahan ezemplu turista sira tama juta ida tama Timor, tinan tinan hahan mai husi neebe, buat sira nee mos fo oportunidade ba agrikultura sira atu halo produsaun.
Iha hasoru malu nee, Prezidente Republika Jose Ramos Horta hatete, sente kontente hasoru malu ho Embaixador inklui mos investor sira husi Brunei, no Prezidente mos apoiu ideas no serbisu neebe mak Brunei atu halo liga ho investimentu neebe sira halo iha Timor Leste.
Nia mos sei halo vizita ba Brunei Darusalam, tanba Timor Leste ho Brunei rai kiik rua iha ASEAN nia laran, tanba nee mak rai kiik rua nee mak lao hamutuk sai furak liu tan.
(eme)
