DILI, STLNEWS.co – Nasaun Brunei Darussalam sei rekruta trabalhador Timor oan rihun 20 resin, atu servisu iha nasaun refere, maibe sei hein akordu rai rua.
Lia hirak nee hatoo husi Embaixador TL ba Brunei Darussalam, Abel Guterres ba jornalista sira, bainhira remata hasoru malu ho Prezidente Republika Jose Ramos Horta iha Palasiu Prezidente Bairo Pite, Tersa (10/10/2023).
Nia hatete, agora daudaun Timor oan seidauk servisu iha Brunei Darussalam, se kuandu Governu TL iha ona akordu mak foin haruka Timor oan ba servisu iha neeba.
“Se ba servisu kompanhia sei anunsiu, hau sei ba halo brifing ho SEKoop iha loron tuir mai, atu koalia konaba prosesu sira nee hotu, neebe hein kuandu los ona aviaun Brunei sei mai foti ema,” katak nia.
Nia hatutan, bainhira aranka halo servisu sei iha asina akordu entre Governu Timor Leste nomos Governu Brunei.
Iha biban nee, Prezidente Republika Jose Ramos Horta hatete, senti kontenti hasoru malu ho kompanhia husi Brunei Darussalam nomos Embaixador Timor Leste ba Brunei, hodi bele koalia konaba kooperasaun servisu.
Prezidente hatete, espera governu bele iha akordu, nunee bele haruka Timor oan sira ba servisu iha Brunei tuir akordu neebe rai rua sei asina hamutuk.
(eme)
