DILI, STLNEWS.co – Partidu Centro Acção Social Democrata Timorense (C-ASDT) nudar partidu kiik, iha kampanha sempre motiva militantes atu labele alerjia ba partidu ka bandeira partidu politiku sira seluk, C-ASDT trsisti haree militantes partidu boot sira halo aktus violentus.
Tuir Sekretariu Jeral Partidu C-ASDT, Gally Soares Araujo iha Dili ba STL liu husi telefone, Sabadu nee (29/04/2023).
“Ami tristi tebes iha periodu kampanha militantes partidu boot 2 halao asaun ka aktus violentu, partidu boot rua nee iha oportunidade atu ukun rai ida nee, maibe sira la konsegue kontrola sira nia militantes sira, i ida nee mos sai hanesan dezafiu ida ba sira”, katak Sekretariu Jeral Partidu C-ASDT, Gally Soares Araujo.
Nia dehan, aktus sira nee mosu dala ruma mos bele iha falhansu tekniku ruma iha kraik sira la konsegue harmoniza, tanba nee militantes halo aktus violentu. Tuir loos tempu agora promo demokrasia, liberdade, maibe akontese fali situasaun sira hanesan nee lamentavel.
Nia hatete, violensia sira nee akontese iha nia motivu ka razaun ruma, tanba nee autoridade kompotente atu halo investigasaun klean ba kazu nee hodi hatene nia motivu, atu nunee evita iha futuru.
“Ami C-ASDT durante ami nia kampanha situasaun lao kontroladu, tanba ami la akumula grupu boot no bainhira ami kampanha ami sempre motiva militantes sira atu lao ho hakmatek labele halo barulhu, respeita malu, labele alerjia ba partidu seluk ka bandeira partidu sira seluk,” katak Gally.
Tuir nia, sira sempre motiva militantes C-ASDT, tanba mesak uma laran deit ka mesak Timor oan deit, mezmu ke diferensa politika, maibe atu ba kompete iha eleisaun ka festa demokrasia nee normal, maibe tenki respeita malu.
Neebe C-ASDT tane aas valor respeitu malu, demokrasia nomos valor familia hanesan uma boot Timor nian.
Tuir nia, partidu sira iha kampanha presiza hatoo mak programa, labele insulta malu, labele provoka malu, tanba ida nee mos bele fo impkatu ba militantes sira, ikus mai sira raan manas bele provoka malu halao violensia.
Tanba nee, husu nafatin ba partidu boot sira atu iha kampanha bele hatoo deit programa ba ukun, atu bele kria nafatin estabilidade pas, dame iha Timor-Leste.
(gui)
