Cabral: Auditoria Ba UNP Lao, Hein Rezultadu

DILI, STLNEWS.co – Prosesu Auditoria ba Uma Naroman ba Povu (UNP) husi kamara de kontas lao hela, tanba nee Ministeriu Administrasaun Estatal (MAE) hein rezultadu ikus, nunee bele implementa fali.

Tuir Ministru Administrasaun Estatal, Tomas Cabral katak, Uma Naroman ba Povu nee laos suspende, osan neebe transferensia tinan 2023 nian iha hela baze, tanba nee hein deit kamara de kontas nia relatoriu husi auditoria.

“Osan neee milhaun US$ 30 resin iha hela, neebe hein hela kamara de kontas halo hela auditoria, hau labele pronunsia buat ida, agora ita hein rezultadu auditoria”, katak Ministru Administrasaun Estatal, Tomas Cabral ba STL, Kuarta (10/01/2024) iha Palasiu Governu.

Nia dehan, daudaun nee seidauk bele pronunsia buat ruma, tanba labele ultrapasa prosesu lao husi kamara de kontas, neebe bainhira rezultadu iha ona bele hahu lao fali, tanba osan neebe iha alokadu iha tinan 2023 nee iha hotu suku kada munisipiu. Tanba nee, daudaun nee auditoria lao hela, hein deit rezultadu auditoria.

Nunee mos Deputadu husi Bankada FRETILIN, Antoninho Doutel Sarmento hatete, programa UNP nee se governu iha kapasidade no rasionalidade pozitivu, diak liu lalika suspende, maibe fo nafatin UNP nee ba povu neebe presiza hetan uma.

“Laos tenki taka tiha hotu, estadu tenki iha kontinuidade, katak governu ida ukun halo hela buat ruma pro-povu, depois iha mudansa ba governu foun tenki fo nafatin kontinuidade ba programa neebe diak ba povu.

Se taka tiha programa nee diak ba povu, nunee mos taka subsidiu fim do anu, no sesta bazika ba familia, nee atu dehan saida, saida mak atu halo diak ba povu, tanba ukun nee ba povu”, katak Deputadu Antoninho Sarmento.

Tuir nia, se dehan daudaun nee UNP iha hela prosesu auditoria, sira iha obrigasaun atu haree ba asuntu sira nee, maibe governu mos tenki iha kbiit atu fo kontinuidade ba estadu ida nee.

(gui)

LEAVE A REPLY

Please enter your comment!
Please enter your name here