DILI, STLNEWS.co – Prezidente Conselho dos Combatentes Libertação Nacional (CCLN), Vidal de Jesus “Riak Leman” hatete, verifikasaun dadus veteranu faze daruak nian sei hapara provizoriu, bainhira eleisaun parlamentar remata mak ekipa verifikasaun hahu hikas fali nia servisu.
“Ohin ami hasoru Primeiru Ministru hodi relata atividade CCLN nian, konaba verifikasaun dadus veteranu, katak verifikasaun nee ita hapara lai, eleisaun liu tiha maka foin hahu fali, tanba verifikasaun mos seidauk hotu i aprovasaun mos balun-balun deit,” dehan Prezidente CCLN Vidal de Jesus “Rial Leman” ba jornalista sira iha palasiu governu, Dili, Tersa nee (29/3/2023).
Prezidente CCLN akresenta, konaba kontinuasaun nee, hein eleisaun hotu mak hahu fali prosesu verifikasaun ba dadus veteranu nian.
“Asuntu ida seluk mak ami presiza halo konsultasaun ho Primeiru Ministru, konaba osan neebe aloka ba fundus veteranu, nunee aban bainrua uza fundus nee ho diak,” hatete Riak Leman.
Prezidente CCLN relata, dadus veteranu neebe seidauk rejistadu hela deit 25%, husi total numeru rezistadu 124 mil ital.
Verifikasaun dadus veranu sira neebe rejistadu ona, 124 mil ital, ida neebe verifika ona 93 mil, sei falta 30 mil ital mak seidauk verifika.
Noventa Tres (93) nee koresponde 75% no sei falta 25% mak seidauk verifika. Ami haree ba mai tanba tempu mos la too ona, kampanha mos besik ona, se ita aprova ka verifika responsavel sira tenki iha neeba, sira mak tenki organiza iha neeba, sira mak organiza ita nia povu, tanba sira tenki marka prezensa,” dehan nia.
Nia haktuir, bainhira ekipa verifika dadus ba partisipa tiha kampanha, se mak sei responsabiliza aprovasaun dadus veteranu, tanba ekipa verifikador sira balun ba halo sosializasaun partidu iha baze, tanba nee CCLN desidi eleisaun remata tiha mak kontinua fali prosesu verifikasaun.
Riak Leman hatete, hafoin dadus sira neebe verifika hotu ona sei haruka mai iha nasional halo aprovasaun.
Nia tenik, validasaun nee atu tinan ida nee ka tinan oin, sei hein orsamentu 2024, bainhira osan nee iha ona, komisaun bele aselera ona prosesu validasaun ba dadus veteranu.
“Hau hanoin tinan ida nee ka tinan oin sei hein orsamentu 2024 nian, ita mezmu aprova tiha agora, osan laiha para fo ba sira simu, neebe ita sei hein orsamentu 2024, depois ita Timor nee kuandu ita aprova tiha mak demora oituan, la selu nia husu retroativu ba tinan kotuk nian,” tenik nia.
Bainhira eleisaun parlamentar 2023 hotu tiha, governasaun foun iha ona, tau orsamentu 2024, hafoin aprova tiha mak CCLN sei akompanha ho orsamentu neebe atu fo hira mak simu no hira mak la simu, se verifika hotu ona foin hakat fali ba lista pendenti.
“Sira neebe lista pendenti mos hanesan, primeiru ami tenki haree, ida neebe rezistu 2009 verifika hotu ona no aprova hotu tiha mak foin hakat fali ba lista pendenti,” nia afirma.
Iha biban nee mos Prezidente CCLN hatete, konaba veteranu falsu daudaun balun tama ona kadeia no balun sei iha faze investigasaun, bainhira eleisaun nee hotu inspetoria ministeriu nia sei ba halo investigasaun o funu ka lae, se nia falsifika nia ba hatan iha tribunal.
Total dadus veteranu neebe rezistadu iha 2009 hamutuk 124 mil ital, sira neebe simu ona pensaun hamutuk 27 mil ital.
(cri)
