DILI, STLNEWS.co – Sentru Nasional Chega (CNC – sigla portugues) ohin atribui tan bolsu estudu ba sobrevivente nia oan, neebe daudaun nee halao hela estudu iha ensinu superior.
Lia hirak nee hato husi Diretor Ezekutivu CNC, Hugo Maria Fernandes, hafoin remata termu asina kontratu ba bolseiru nain 5, iha salaun CNC, Balide, Dili, Sesta (31/03/2023).
“Ohin ita halao atribuisaun bolsu estudu ba sobrevivente mukit liu sira nia oan, tinan kotuk ita atribui uluk ba nain 7, tinan ida nee atribui tan ba nain 5,” dehan nia.
Nia hatete, atribuisaun nee bazeia ba dadus neebe CNC hetan husi asosiasun vitima, asosiasaun prizoneirus politika, husi Asosiasaun Chega Ba Ita (ACbit) ho Asia Justice and Rights (AJAR), neebe mak durante tinan naruk halo akompanhamentu ba sira nia inan aman, neebe vitima husi funu.
Hafoin iha prosesu naruk, sentru chega hanesan institutu publiku estadu harii, CNC nia mandatu ida mak atu tau matan ba sobrevivente neebe mukit, liu husi sira nia oan neebe mak iha kumpromisu boot hakarak kontinua estudu iha nivel ida boot liu, maibe husi aspeitu finansial sira nia inan aman sira laiha kbiit.
Diretor CNC nee hatete, mezmu vitima sobrevivente barak, maibe laos vitima hotu-hotu iha kondisaun ida mukit, vitima prizoneiru balun agora sai emprezariu, sai politiku, sai deputadu.
“Ita nia alvu nee mak sira neebe too agora laiha kbiit, depois ita ukun aan tinan 20, sira kontinua iha kondisaun neebe laiha kapasidade finanseiru atu tulun sira nia aan rasik, satan atu tulun sira nia familia,” informa nia.
Nia relata, rekezitus neebe CNC foti antes fo bolseiru mak haree ba kondisaun sira nia inan aman nian, ida neebe mukit liu mak CNC oferese bolseiru nee, mezmu iha sobrevivente barak maibe presiza identifika ho lo-loos, bolsu estudu nee oferese deit ba sira neebe eskola iha ensinu superior.
“Bolsu estudu nee atribui ba sira, orsida sira iha obrigasaun tuir universidade nia kriteria, sira sei selu ba universidade, kada fulan ida sira sei hetan US$ 150, bolsu nee mos atu kobre sira nia nesesidade loron-loron nian, karik sira sei selu kost, han hemu, transporte ba eskola, atendimentu livru nomos atribuisaun ba senhas iha universidade,” nia akresenta.
Nia haktuir, osan neebe atribui ba sira iha bolsu estudu nee, bainhira sira jere ho didiak, sufisienti atu selu sira nia senhas iha universidade nomos sira nia nesesidade loron-loron.
Total orsamentu neebe aloka ba bolseirus nain 12 nee US$ 150 kada fulan, tinan ida kada bolseiru sei simu US$ 1.800, nunee iha tinan ida nia laran CNC sei atribui osan US$ 21.600 ba bolseiru nain 12. Bolseiru sira nee kuaze mai husi munisipiu hotu, entre bolseiru sira balun eskola iha UNPAZ, ISC, UNITAL, UNDIL inklui DIT.
(cri)
