DILI, STLNEWS.co – Reprezentante povu iha uma fukun Parlamentu Nasional (PN) liu husi Deputada Bankada CNRT, Virgina Ana belo husu progresu intervesaun governu nian ba Timor oan sira neebe iha Portugal agora too ona iha neebe, tanba too agora sira sei kontinua toba iha estrada ninin.
Deputada nee dehan, hakarak husu konaba kondisaun trabalhadores Timor oan sira neebe iha Portugal, neebe too agora sira balun sei kontinua sei hela iha estrada.
“Hau la hatene dekretu lei 76/2022 neebe governu hasai hodi hili ita nia sekretariu estadu, hodi tau tiha ona osan depois atu ajuda ka atu rezolve tiha situasaun nee, ninia lalaok too tiha ona iha neebe,” dehan nia liu husi plenaria iha PN, Tersa nee (04/04/2023).
Nia afirma, tanba maluk Timor oan sira nee sei kontikua toba iha estrada, no sira sei kontinua hein ajuda husi Cruz Vermelha nasaun neeba nian, la hatene sa tratamentu tan mak estadu ida nee atu fo ba iha povu sira neebe mak presiza.
Nia hatutan, tanba nee husu favor ba governu atu tau fila fali atensaun ba iha maluk Timor oan sira neebe sei kontinua hela iha estrada iha Portugal neeba, sira la merese simu situasaun ida nee ho tempu naruk hanesan nee.
(dom)
