DILI, STLNEWS.co – Bankada CNRT iha uma fukun Parlamentu Nasional (PN) konsidera Prezidente Parlamentu Nasional (PPN) laiha kompetensia atu hakotu mandatu Komisariu KAK Sergio Hornai, tanba nomeasaun nee laos nia mesak, maibe liu husi prienxe korum três quatro tarsus.
“Relasiona ho PPN fo karta hakotu mandatu Komisariu KAK Sergio Hornai. Primeru atu dehan, PPN laiha kompetensia, hau atu dehan PPN laiha kompetensia, tanba laos nia mak nomeia diretamente ka mesak deit ba Komisariu KAK nee, maibe ida nee desizaun husi depuatdus hotu-hotu neebe prienxe korum três quatro nee mak nomeia Komisariu KAK,” hatete Deputada Bankada CNRT, Carmelita Moniz ba jornalista sira iha PN, Segunda nee (17/04/2023).
Nia afirma, agora se kaer fila fali ba prinsipiu kontinuidade instituisional buat ida neebe bele halo, nudar opozisaun fo nia idea nee iha plenaria katak, parlamentu bele halo aprova rezolusaun ida hodi fo kontinuidade ba lai Komisariu KAK ho nia adjuntu sira neebe mak agora iha too nomeiasaun foun mosu, ida nee parlamentu bele halo.
Nia esplika, maibe tenki liu husi aprovasaun iha plenaria, liu husi rezolusaun PN nudar desizaun politika masimu liu iha rai ida nee, neebe akordu ho K-RDTL neebe atribui kompetensia ida nee ba PN, ida nee mak uniku bele halo.
Nia hatutan, karta neebe PPN fo hakotu mandatu Komisariu KAK Sergio Hornai legalmente la vale ka laiha valor juridiku, tanba PPN laiha kompetensia.
Aleinde nee, Prezidente Komisaun A neebe trata asuntu Konstitusionais no Justisa, Deputadu Joaquim do Santos afirma, PPN hakotu mandatu Komisariu KAK laos la legal, tanba Komisariu KAK nia mandatu hotu.
“Tuir nia, prosesu dentru do prazu 30 dias molok Komisariu KAK ezistente nee nia mandatu hotu, PN tenki iha ona kandidatu foun eleitu ona nee tuir lei, maibe prazu liu tiha 30 dias mais Komisariu KAK foun seidauk iha, komisariu atual sesante tenki para ona, nee lei mak fo,” hatete nia.
Jaoquim afirma, maibe lei mos fo kompetensia ba iha PPN, se seidauk kumpri 30 dias iha KAK foun, entaun PPN bele husu ba Komisariu KAK bele aguenta tan lai fulan 1 ka 2, konforme nia husu para PN halo prosesa lai eleisaun ba Komisariu KAK foun.
Nia tenik, mais liu tiha fulan 3 nee Komisariu KAK foun laiha mak PPN mos labele husu dala rua atu estende tan, tenki kumpri lei nee mak PPN halo, neebe la kontra lei ida.
(dom)
