DILI, STLNEWS.co – Reprezentante povu iha uma fukun Parlamentu Nasional preokupa ho Servisu Eletrisidade Timor Leste Empreza Publika (EDTL, E.P) ladun fo atendimentu diak ba populasaun sira iha Atauro neeba, tanba kalan ida asesu eletrisidade oras 3 deit.
Kestaun nee haktuir husi Deputadu Bankada Partidu CNRT, Ricardo Baptista liu husi plenaria Parlamentu Nasional, Segunda nee (24/07/2023).
“Senhor Sekretariu Estadu Eletrisidade iha Atauro neeba nee populasaun sira halerik ba eletrisidade, tanba ahi lakan husi tuku 19:00 too 22:00 kalan nee ahi mate ona,” dehan Deputadu Bankada Partidu CNRT, Ricardo Baptista.
Nia hatutan, governu liu husi EDTL.E.P husu populasaun sira monta prepagu no hola pulsa, tanba nee populasaun sira iha direitu atu asesu eletrisidade durante 24 oras nia laran.
“Tanba populasaun sira tau tiha ona prepagu no ba sosa ona pulsa, maibe ita nia atendimentu ba sira nee la dignu, nee ema nia direitu, ema hakarak halo keisa ruma hasoru governu mak EDTL foin responsabiliza ba ida nee, tanba ita haruka tiha komunidade sira selu depois ita nia atendimentu ba sira nee laiha liu,” dehan nia.
(alb)
