DILI, STLNEWS.co – Bankada Governu kestiona IX Governu Konstitusional halo redusaun Orsamentu Retifikativu (OR) neebe aloka ba Ministeriu Obras Publikas (MOP), hodi atende preokupasaun komunidade sira iha Kosta Sul, neebe foin lalais hasoru kalamidade neebe estraga infraestrutura barak inklui uma komunidade sira nian.
“Hau liga ba MOP, ita hotu hatene foin lalais iha dia 4-5 Junhu iha akontesimentu boot ida kalamidade, neebe akontese iha Kosta Sul afeta ba iha munisipiu 7, maibe iha OR halo redusaun fali ba orsamentu, neebe aloka ba estrada ho ponte, hau la hatene osan nee tau iha neebe, keta hau mak sala karik, husu Visi Ministru bele esplika hela, tanba komunidade barak preokupa too agora governu seidauk normaliza estrada no ponte sira neebe hetan estragus, maibe iha MOP hasai fali osan atu hadia estrada no ponte sira,” dehan Deputadu Bankada CNRT, Marcos Xavier, durante audensia ho Ministeriu Finansas, Kuarta (16/08/2023) iha PN.
Marcos hatete, iha orsamentu orijinal tinan 2023 ba MOP hamutuk milhaun US$ 180, 311 mil 256 dolar amerikanu fahe ba programa neen, maibe iha Orsamento Retifikativu Governu halo fali redusaun iha neeba, liu-liu redusaun orsamento ba EDTL-EP neebe nia redusaun kuaze milhaunUS$ 29 ital, tanba iha Orsamento Jeral Governu tau milhaun US$ 100, Visi Ministru bele esplika took mai tanba ministru tutela la marka prezensa iha nee.
“Tuir fali mak BTL.ep nee mos iha redusaun, nunee presiza esplikasaun, tanba parte seluk Governu aumenta fali osan ba iha Ministeriu Transporte no Telekomunikasaun (MTK), husi total orsamento orginal montante milliaun 11 ital, iha Orsamentu Retifikativu, governu aumenta tan osan US$ 900 mil ba iha programa 08 teknolojia informasaun no komunikasaun,” afirma Prezidente Komisaun E.
Nia sublina, ministru bele esplika took mai, ida neebe mak ujensia, situasaun vitima sira hasoru kalamidade mak emergensia liu, entaun sei osan nee aloka ba programa MTK nian nusa la aloka osan ba MOP, liu husi OJE hodi halo normalizasaun ba estrada ponte no mota hodi fasilita populasaun sira, selae iha debate OR sei halo proposta koa tiha osan ba MTK maske bankada governu.
Hatan ba kestaun nee Visi Ministru Finansas, Helder Lopes, esplika MOP rasik ninia orsamento halo redusaun ba hamutuk milhaun US$ 9.5, transferensia ba EDTL-EP hamenus tiha milhaun US$ 30 no transferensia ba BTL-EP hamenus milhaun US$ 5.
“Agora kona ba redusaun iha MOP, ida nee Ministru depois konsulta ho nia tekniku sira projeitu balun ninia prosesu lao nei-neik, entaun sira hasai tiha orsamento, neebe uluk preve tanba dalaruma to’o tinan remata uza osan ho montante deit laos orsamento orginal, neebe preve tanba nee mak sira mai halo redusaun ba milhaun US$ 9.5. Agora ba EDTL-EP, redus milhaun US$ 30 tanba orsamento orginal EDTL nian iha transferensia milhaun US$ 100 no husi milhaun US$ 100 nee transfere ona milhaun US$ 50 ba sira nunee iha OR aprova deit milhaun US$ 20, tanba governu hasai tiha milhaun US$ 30,” haktuir nia.
Helder dehan, redusaun ba EDTL-EP nee komfirma ona ho parte EDTL no komfirma laiha problema tanba EDTL iha balansu iha konta, neebe bele asegura sira nia funsionamento nuudar Empreza no asegura eletrisidade bele lakan inklui projeitu eletrifikasaun sira, neebe iha ona planu kontinua implementa.
(gui)
