CNRT Submete Lista Ba TR, PD Preparadu Kompete

DILI, STLNEWS.co – Iha Kuarta loraik nee reprezentante Partidu CNRT, Joãozito Viana neebe akompanha husi Cedeliza Faria do Santos iha tuku 3 loraik, submete ona lista kandidatus CNRT nian ba Tribunal Rekursu (TR), nunee mos Partidu Demokratika (PD) neebe reprezenta husi Arcanjo Leito submete mos lista PD nian, preparadu atu kompete iha eleisaun parlamentar 2023.

“Ohin tuku 3 liu minutu 15, Partidu CNRT submete ona nia lista kandidatu deputadu/a efetivu 65 no suplienti 25 tuir lei haruka,” hatete reprezentante Partidu CNRT, Joãozito Viana ba jornalista sira, hafoin submete lista kandidatu deputadu sira nian iha Tribunal Rekursu, Kaikoli, Dili, Kuarta nee (15/3/2023).

Nia hatete, ohin mos tuir kalendariu markasaun ba eleisaun no submisaun kandidatura partidu politiku sira ba eleisaun parlamentar 2023, Partidu CNRT kumpri hodi hatama nia kandidatu sira nia lista ba iha Tribunal Rekursu.

“Ohin loron 15 fulan Marsu, ohin tuir kalendariu markasaun ba eleisaun nian ba submisaun kandidaturas partidus politikus sira ba eleisaun parlamentar 2023, felizmente Partidu CNRT hatama ona lista kandidatus sira ba iha Tribunal Rekursu simu ho diak, tanba ami hatama dokumentus kompletu, laiha reklamasaun ruma, neebe ami tenki kompleta, la sidi tuir rekezitus neebe ami prepara durante semana rua nia laran,” informa nia.

Nia dehan, konaba lista Partidu CNRT nian partisipasaun feto 30%, neebé tuir lei haruka katak feto ho mane iha direitu hanesan, maibé hanesan parte tékniku konsege hatama ona lista hodi hein tribunal nia desizaun, hafoin kompete iha kampanha eleisaun parlamentar 2023.

Etretantu, Cedeliza Faria do Santos haktuir konaba reprezentante feto CNRT iha lista neebe hatama ba TR nee lao tuir lei haruka.

“Lista naran kandidatu feto tuir lei hatete nee 30 %, entaun ami mos kumpri tuir lei nee,” dehan nia.

Nia afirma, konaba lista naran, kuantidade husi deputadu feto neebe CNRT hatama nee hira, sira labele temi sai, Tribunal Rekursu mak bele fo sai.

Iha fatin hanesan, Visi Sekretariu Jeral Partidu Demokratiku (PD), Arcanjo Leite hatete, PD lokraik nee mai submete lista ba TR.

“Ohin PD mai submete lista kandidatu deputadu sira ba Parlamentu Nasional i ami subemete ona, nee hanesan aktu komplimentu no rekezitus legais neebe vigor iha Timor Leste,” dehan Arcanjo.

Hafoin submete tiha lista naran deputadus sira ba iha parlamentu, Sekretariu Jeral Partidu Demokratiku (PD), Arcanjo Leite hatete, Partidu Demokratiku preparadu kompete iha eleisaun parlamentar.

(cri)

LEAVE A REPLY

Please enter your comment!
Please enter your name here