Council Of Asian Liberal And Democrats Halo Enkontru Ho PR Horta

DILI, STLNEWS.co – Prezidente Republika (PR) Jose Ramos Horta halo enkontru ho Council of Asian Liberal and Democrats Chairperson Liberal Party Of the Philippnes, hodi koalia konaba ezistensia Konselhu Liberal no Demokratiku.

Bainhira remata enkontru, Francis N Pangilinan hanesan Founding Partener husi Chairperson, Council of Asian Liberal and Semocratic ba jornalista sira iha Palasiu Prezidente Bairo Pite Segunda nee (17/07/2023) hatete, haksolok hodi hasoru malu ho Prezidente Republika Jose Ramos Horta, nunee sira bele introdus aan ba Xefi Estadu.

Francis dehan, mai hasoru malu ho PR Horta hodi introdus nia aan, no iha hasoru malu nee nia mos konvida partidu politiku husi Timor atu tama Konselhu Liberal no Demokratiku Asia.

Iha enkontru nia mos informa katak, konaba konflitu iha Míanmar, sira sei apoia no esforsu atu fo inspirasaun ba foinsae sira atu envolve, nunee mos atu proteje no defende demokrasia no liberalizmu iha rejiaun neeba.

“Ami halao sorumutuk neebe diak tebes ho Prezidente Republika José Ramos Horta no ami hein katak ida nee sei lori partidu polítiku balun iha Timor Leste hodi tama iha Konselhu Liberal no Demokratiku Asia nian, hanesan ita bolu organizasaun membru partidu polítiku,” katak nia.

Nia hatutan, oras nee daudaun membru barak husi nasaun oin-oin mak tama ona membru Konselhu Liberal no Demokratiku Asia.

“Ami iha membru sira husi Tailandia, Singapura, Azia, observador sira husi Japaun, ami iha membru sira husi rai Kamboja no Filipina, nunee ami diskuti ida nee ho Prezidente Ramos-Horta, oinsa buka dalan partidu polítiku sira iha Timor Leste mos bele hola parte,” katak nia.

Nia akresenta, iha hasoru malu nee sira mos koalia konaba asuntu internasional sira hanesan preokupasaun konaba konflitu iha Míanmar nomos seluk tan.

Iha biban nee Prezidente Republika Jose Ramos Horta mos preokupa ho konflitu neebe mak iha Míanmar, husu proteje no defende demokrasia no liberalizmu iha rai neebe nakonu ho konflitu, nunee povu iha rai refere bele moris iha pas no hakmatek nia laran.

(eme)

LEAVE A REPLY

Please enter your comment!
Please enter your name here