DILI, STLNEWS.co – Diplomata sira iha Timor-Leste inklui Ministeriu Estranjeiru no reprezentante husi nasaun barak mai hametin kooperasaun ho IX Governu, apoia ba dezenvolvimentu, parte pozitivu, labele nega.
Lia hirak nee hatoo husi Visi Bankada FRETILIN hanesan mos bankada opozisaun David Dias Mandati katak, nasaun barak liu husi sira nia diplomata iha Timor-Leste, ministeriu estranjierus inklui reprezentante nasaun lubuk, kontinua hametin kooperasaun bilateral ho Timor, pozitivu tebes.
“Hau atu dehan, tak ada yang bisa jadi pulau, ita labele forma aan mesak, maibe ita ema interaksia ba malu, nasaun mos interaksi ba malu, tanba nee ita haree pozitivu”, katak Visi Bankada FRETILIN hanesan mos bankada opozisaun David Dias Mandati ba STL iha parlamentu, Tersa (15/08/2023).
Nia hatete, husi estranjeiru kontinua mai hasoru Primeiru Ministru Xanana Gusmão neebe lidera IX Governu, hakarak kontinu hametin kooperasaun bilateral, ida ne epozitivu tebes, ita tenki fo fiar ba malu nafatin, nunee kooperasaun lao ba oin.
“Se kooperasaun nafatin lao ba oin, vantajen nee nakloke ba ema hotu (amplas os lados)”, tenik David.
Tuir nia, hanesan opozisaun haree, parte pozitivu tebes, labele nega, tanba nee kooperasaun bilateral sira nee hametin nafatin hodi servisu hamutuk.
Entretantu, liu husi komunikadu Gabinete Primeiru Ministru neebe STL asesu haktuir, horiseik lororaik Segunda (14/07/2023), Primeiru-Ministru Kay Rala Xanana Gusmão halao enkontru ho Enkarregada Negosiasaun Embaxada Australia ba Timor-Leste, Caitilin W, hodi reafirma kometimentu Governu Australia apoia IX Governu.
Enkarregada Negosiasaun Embaxada Australia ba Timor-Leste, Caitilin W, agradese bele hasoru direita Xefi Governu Xanana hodi reforsa linha kooperasaun servisu neebe antes, primeira semana Ministra Negósiu Estranjeiru Austrália Senadora Penny Wong informa ona ba Primeiru Ministru no hatoo mos mensajen husi Primeiru Ministru Austrália, Anthony Albanese neebe kongratula no dezeja susesu ba governu foun.
“Ami sei esforsu hodi apoia IX Governu Konstitusionál, iha programa prioridade ba area sosial, dezenvolvimentu infraestutura, diversifikasaun ekonomia no dezenvolvimentu sira ba interese hamutuk povu nian,” informa Caitilin W.
Australia no Timor-Leste sei kontinua servisu hamutuk hodi hametin kooperasaun iha setor hotu neebe sei ajuda dezenvolvimentu Timor-Leste.
(gui)
