DILI, STLNEWS.co – Partidu Libertasaun Popular (PLP) iha uma fukun Parlamentu Nasional (PN) konsidera Prezidente Republika (PR) Jose Ramos Horta ninia deklarasaun nee ambigu demais no la klaru, saida mak ninia hakarak.
Tuir Deputada Bankada PLP, Maria Angelina Lopes Saramento dehan, deklarasaun PR nian nee ambigu demais, tanba nia sentidu dehan la haklaken demokrasia iha saida, la haklaken demorasika katak partidu politiku sira ba halo kampanha insita ema ba violensia mak dehan laos promove demokrasia ka, ou hakilar viva-viva depois hatoo ninia programa, hatoo ninia estratejia politika, hatoo nia vizaun ba longu prazu, filizofia partidu nian nee mak dehan la haklaken demokrasia ka ida oinsa.
“Ba hau hanesan ambigu oituan no la klaru saida mak PR hakarak esklarese iha nia deklarasaun nee, mais ba partidu politiku sira seluk hau la hatene, pelumenus ba ami nia Partidu PLP ami laiha tempu atu halo propaganda falsu, ami lakohi atu gasta enerjia ba insulta ema seluk, ba insulta lider ida hodi favorese ka valoriza lider seluk,” dehan nia ba STL iha PN, Segunda nee (24/04/2023).
Nia hatete, ba PLP oinsa haklaken nia programa, haklaken nia atinjimentu durante 5 anos PLP ukun husi ida neebe ladiak, PLP trasforma ba diak no ida diak nee atinje duni ba povu hodi hetan moris diak no povu sente ona saida mak PLP reazida durante tinan 5 nia laran.
Nia afirma, maibe tempu atu haklaken PLP ninia programa, politika no atijimentu neebe mak PLP halo ona durante tinan 5 ukun, atu bele konvense povu hodi vota iha eleisaun parlamentar agora.
Aleinde nee, Visi Prezidente Bankada FRETILIN, Deputadu Antoninho Bianco hatete, relasiona ho PR ninia razaun neebe lakohi fo pose ema nee, so PR mak hatene.
“Ita labele sik fali prezidente ninia hakarak atu fo pose ka la fo pose, entaun razaun importante nee hau la hatene, maibe prezidente iha direitu no dever tuir konstituisaun katak, partidu ida neebe hetan fiar iha eleisaun menan depois forma tiha sai parlamentu, asegura tiha iha meja parlamentu, depois sira bele indika sira nia ema ida hanesan PM, depois PM lori ba indikadu PR tenki fo pose nee konstituisaun mak haruka,” dehan nia.
Nia afirma, laos PR deit mak buka pas, maibe ema hotu-hotu, buka paz neebe laiha razaun, tanba pas ho hakmatek lao iha fatin-fatin.
Nia sublinha, FRETILIN ba koalia nia programa laos ba koalia ninia figura, tanba ukun atende ema fo moris diak nee tenke ho programa, entaun FRETILIN nian lao ho programa ba too iha aldeia suku nian iha, FRETILIN halo kontratu sosial iha nivel aldeia no suku se sira konkorda ho hirak nee moris diak ba sira, entaun sira afavora, se sira la konkorda nee buat seluk ida.
(dom)
