DILI, STLNEWS.co – Timor Leste (TL) hanesan nasaun neebe depende makaas ba produtu importasaun husi rai liur, tanba nee ba oin sei hasoru krize ai haan. Sekuadu governu laiha politika atu dezenvolve setor agrikultura iha TL.
Kestaun nee fo sai husi reprezentante povu iha uma fukun Parlamentu Nasional, Deputada Olinda Guteres ba STL liu husi telefone, Domingu (20/08/2023).
“TL hanesan nasaun neebe depende makaas ba produtu importasaun husi rai liur, no laos TL mesak mak hasoru krize ai han, tanba agora daudaun nasaun sira neebe durante nee hatama foos mai TL nee, sira hapara tiha ona atu esporta ba nasaun importador sira inklui TL, tan nee hahu agora tenki dezenvolve daudaun ona toos ho natar sira neebe abandona durante tinan barak,” dehan Deputada KHUNTO nee.
Nia afirma, oras nee daudaun povu hakilar makaas konaba folin foos, nomos nesesidade baziku sira, lo-loos la tempu ona atu povu halerik ba foos, tanba TL potensial barak atu produs, tan nee husu governu tenki book aan koopera ho agrikultur sira, hodi hasae produsaun iha rai laran, karik nasaun India no Vietnam la hatama foos mai, mak povu bele konsumu nia produtu neebe produs iha rai laran.
Nunee mos tuir observasaun STL nian iha terenu haree katak, sasan folin iha merkadu rai laran sae makaas tebes, tanba nee presiza intervensaun mediata husi governu.
(mad)
