Deputada Olinda Husu IX Governu Kontinua US$ 200 Kada Uma Kain

DILI, STLNEWS.co – Reprezentante povu iha uma fukun Parlamentu Nasional (PN) liu husi Bankada KHUNTO, husu ba IX governu kontinua programa US$ 200 ba komunidade kada uma kain, iha fim do ano.

Xefi Bankada KHUNTO, Deputada Olinda Guterres hateten, hanesan reprezentante povu hakarak programa US$ 200 IX Governu kontinua, karik buat neebe la diak, maibe buat neebe diak bele kontinua.

“Hau hanoin subsidiu fim do ano US$ 200, osan oituan kada tinan dala ida, laos fo fulan-fulan, fo netik iha fim do ano, atu ita nia povu hodi selebra loron boot,”, katak Xefi Bankada KHUNTO, Olinda Guterres ba jornalista sira iha Parlamentu Nasional, Sesta (11/08/2023).

Nia afirma, US$ 200 kada uma kain nee nesesidade duni ba povu, membru governu, deputadu, funsionariu sira hotu fim do ano hetan osan desimu terseiru, tanba nee povu mos direitu hetan.

Tuir reprezentante povu nee katak, husi votus povu nian mak ita tuur iha governu no parlamentu, tanba saida deputadu ho membru governu laos eleitu husi familia, maibe husi povu.

Entretantu, Visi Ministru Asuntu Parlamentares, Aderito Hugo hatete, subsidiu US$ 200 desizaun halo iha governu anterior nia politika, IX Governu sei haree katak politika nee pozitivu ba dezenvolvimentu nasaun nian, maibe subsidiu sira nee la kontribui.

Nia katak, desizaun politika VIII Governu halo iha tempu la normal, maibe subsidiu nee ladun pozitivu ba inisiativa povu.

Bele halo, maibe haree situasaun neebe obriga katak tenki halo. Maibe estadu labele moris deit ho subsidiu, governu tenki solusiona dezenvolve ekonomia, hasai povu husi kiak, kria kampu servisu, bele kontribui ba dezenvolvimentu ekonomia.

Desizaun ba subsidiu nee posivel, maibe tenki hanoin katak partidu politiku sira iha diskursu fatin hotu, katak dependensia ba Fundu Petroliu no kampu fo mina nee Bayu Undan neebe prosesu atu maran ona.

“Haree ba kestaun nee mak ita la halo medidas mudansa atu kontribui ba sustenvel dezemvolvimentu. Tanba nee, IX Governu sei buka esforsu oin-oin kria kampu servisu, hasae kresimentu ekonomia”, katak Aderito.

(gui)

LEAVE A REPLY

Please enter your comment!
Please enter your name here