DILI, STLNEWS.co – Dezenhu no Bill of Quantity (BOQ) ba ponte Kasnafar sei iha hela problema ho kompanhia dezde fulan Dezembru tinan kotuk, too agora seidauk rezolve.
Preokupasaun nee hatoo husi Ministru Obras Publiku (MOP), Abel Pires, ba jornalista iha nia knaar fatin MOP Kaikoli, Dili, Tersa nee (26/07/2022).
Tuir Abel katak, ponte Kasnafar Postu Administrativu Laulara, Munisipiu Aileu, tuir planu sei konstrui ponte ida ho modelu hanesan ponte Tono iha Rejiaun Administrativu Ambeno Oekusi, maibe nia prosesu dezenhu agora sei iha hela problema ho kompanhia neebe halo dezenhu.
“Kompanhia nee ema Timor oan, maibe servisu lenuk demais, dezde fulan Setembru tinan kotuk too ohin loron ami seidauk rezolve kestaun balun neebe ADN presiza, nunee atu bele hetan ninia montante total husi kustu ponte Kasnafar,” dehan Abel.
Nia afirma liu tan, parte governu halo ona enkontru diretamente ho kompanhia dala rua ona, hein katak semana nee bele rezolve finalizasaun dezenhu BoQ, kuandu finaliza ona, ekipa loke prosesu tenderizasaun ba publiku.
Iha sorin seluk, Diretor Nasional Estrada Ponte Kontrolu no Seias, Milton Ramanata de Castro, tinan ida nee konstrusaun neebe sai prioridade atu konstrui mak ponte Kasnafar, agora daudun konsultor ida mak halo hela dezenhu BoQ no iha ona faze finalizasaun.
(mad)
