DILI, STLNEWS.co – Ministru Asuntu Parlamentares no Komunikasaun Sosial (MAPKOMS), Francisco Jeronimo hatete, governu desidi ona edifisiu foun Parlamentu Nasional sei harii iha Hera.
Kestaun nee MAPKOMS hatoo bainhira halao audiensia ho Primeiru Ministru (PM), Taur Matan Ruak, iha rezidensia ofisial, Segunda nee (01/08/2022).
“Asuntu neebe hau ho Primeiru Ministru kolia mak konaba servisu iha Parlamentu Nasional nian, liu-liu relasiona ho pedidu husi Parlamentu Nasional neebe husu governu atu atribui propriedade rai hodi bele harii edifisiu foun iha futuru. Entaun iha nee hau ho Visi Ministru Finansas no mos Ministru Justisa hasoru malu ho Prezidente Parlamentu Nasional halo ona diskusaun, iha ona solusaun katak, rai ida neebe mak atu uza iha Hera, sira husu ektare 10, tanba nee governu prontu ona aprezenta, nunee tempu badak sei halo atribuisaun,” dehan nia.
Nia dehan, governu prontu ona atu aprezenta iha tempu badak, sei halo atribuisaun ba rai Parlamentu Nasional, maibe sei halo uluk lai levantamentu dadus ba komunidade sira neebe okupa rai estadu iha fatin konstrusaun edifisiu foun Parlamentu Nasional.
Tanba atu fo indemnizasaun presiza halo levantamentu uluk, nunee bele hatene lo-loos uma kain hira mak okupa rai estadu, antes preve osan atu halo indemnizasaun ba komunidade sira neebe okupa ona rai estadu.
(alb)
