DILI, STLNEWS.co – Reprezentante povu iha uma fukun Parlamentu Nasional (PN) liu husi Xefi Bankada PD, Deputadu Antonio da Conceição “Kalohan” hatete, edukasaun mak sai hanesan xave hodi prepara sosiedade ba iha futuru mai.
Deputadu nee dehan, relasiona ho kontratu profesores sira nian, senhor Diretor Raimondo Nito halo gravasaun ida konversa ho profesor sira hodi dehan katak, hotu-hotu tenki ser vota lai ba iha partidu A, neebe agora daudaun Ministru Armindo Maia nudar Partidu FRETILIN.
“Ema intelektual ida hau respeita tebes nia profisaun no ninia kontribuisaun ba luta, maibe hau hanoin edukasaun nee se bele ita hotu konsiente ba atu prepara ita nia sosiedade ida ba futuru ninian, xavi mak ida nee,” dehan nia liu husi Plenari iha PN, Segunda nee (03/04/2023).
Nia afirma, labele ba obriga malu fali, profesor voluntariu sira ho Diretor Raimondo Nito nia gravasaun neebe sirkula no dehan agora ba enkontru hela iha Singapura, buat sira nee la diak ida, no edukasaun labele eduka ema hanesan nee.
Nia tenik, responsavel sira neebe mak diak atu prepara sosiedade nian ba futuru, ba halo fali promesa sira hanesan nee, ladun diak ida i Diretor Raimondo Nito nee ba pesoal hatene nia nee kamarada diak no nia dedikasaun nee iha pozisaun ida edukasaun nee nian.
“Tanba nee, husu atu tau sees tiha buat sira nee ba, hodi foti netik edukasaun nee valoriza, i hau husu favor ba Ministru Edukasaun mos labele haree mensajen sira sirkula nee husik lian hela deit, nee lamentavel tebes,” tenik nia.
Nia hatutan, ema sira neebe mak ho vizaun naruk ba Timor ninian, hahu hanoin barak hanesan nee, depois sira haluhan tiha dehan katak sei iha oan no bei oan sira neebe sei moris iha tempu ba futuru nian, tanba nee husu ba edukasaun mos fo avizu ba atu labele halo boatus sira hanesan nee iha periodu kampanha nee.
(dom)
