DILI, STLNEWS.co – Timor Leste sei halao festa demokrasia ba eleisaun parlamentar iha loron 21 fulan Maiu, tanba nee Movimentu Siviku Nasionalista Timorense (MOCNAT) sei apoia Partidu CNRT neebe lidera husi Kay Rala Xanana Gusmão, hodi ba tuur fali iha governu, nunee halao dezenvolvimentu.
Deklarasaun nee hatoo husi Prezidente MOCNAT, Ete-Uco Guterres katak, MOCNAT atu eduka povu oinsa bele partisipa iha festa demokrasia ba periodu ba kada tinan 5. Sira nia movimentu halai liu ba interese nasional, laos partidu politiku, maibe nudar rezistensia nia ema durante tinan 24 nia laran, lema katak liberta patria no liberta povu. Enkuantu patria libertadu ona, agora atu liberta povu. Tanba nee haree husi tinan 2002 Timor forma governu, agora tama ona ba tinan 20 resin, maibe povu seidauk moris diak.
“Ita nia nasaun demokratiku, partidu ami konsidera hanesan instrumentu, neebe ami kontinua lao nafatin iha baze atu apoia Xanana, hodi hadia rai ida nee, nunee iha futuru mak entrega ba jerasaun foun,” deklara Prezidente MOCNAT ba STL, Segunda nee (10/04/2023) iha Balide.
Nia hatete, ekonomikamente Timor ukun aan tinan 20 resin ona, governu troka ba troka, gasta povu nia osan liu husi fundu petroliferu neebe hasai kada tinan, maibe too agora povu seidauk senti moris diak, tanba nee sai pereokupasaun boot.
Nia kestiona, kada tinan parlamentu aprova orsamentu bilhaun ba bilhaun, maibe nia prosesu ba progresu moris diak povu nian laiha. Tanba nee MOCNAT fo apoia ba Xanana liu husi Partidu CNRT atu ba fali iha governu hodi hadia rai ida nee.
Tuir nia, realidade hatudu katak uniku figura neebe mak hanoin ba interese nasional interese povu so Xanana mak bele, tanba nee husik Xanana ukun lai too kompleta tiha negosiasaun fronteira maritima, mezmu ho Australia loos ona, maibe ho Indonezia agora daudaun lao hela, neebe husik Xanana ukun lai too kompleta tiha, depois lori povu ba moris diak tiha mak entrega ba jerasaun foun.
Iha parte seluk, Xefi Bankada CNRT Duarte Nunes via telefone katak, ho apoia sira neebe mak agora daudaun iha ba CNRT, sira garante katak sei hetan vitoria iha eleisaun parlamentar.
Xefi Bankada CNRT hatete, sira fiar katak CNRT sei hetan konfiansa husi povu, no CNRT sei manan maioria absoluta, mezmu iha partidu 17 mak kompete, maibe sira nafatin garante katak CNRT sei hetan votus maioria absoluta ho programa partidu nian neebe sei hatoo iha kampanha.
(gui)
