DILI, STLNEWS.co – Parlamentu Nasional (PN) lamenta akontesimentu iha Munisipiu Likisa, iha sede Partidu CNRT, ema deskonhesidu koa kotu Bandeira Republika Demokratiku Timor Leste (RDTL) ho CNRT nia talin hodi hatun ba rai.
Preokupasaun nee hatoo husi Deputadu Bankada CNRT, Leandro Lobato katak, horikalan akontese iha sede Partidu CNRT iha Munisipiu Likisa, ema deskonhesidu ba koa Bandeira RDTL ho Bandeira CNRT nia talin hodi hatun bandeira nee ba rai.
La hatudu ba partidu ida, nee ema deskonhesidu, maibe bele mos politika balu mak halo aktus hanesan nee.
“Hahalok nee lamentavel, tanba koa tiha Bandeira RDTL ho CNRT nia talin hodi hatun tiha ba rai, hau hanoin laos Partidu CNRT deit mak tristi, maibe ba mos partidu sira seluk, tanba labele hatudu hahalok sira hanesan nee ba ita nia simbolu nasaun,” dehan Deputadu Bankada CNRT, Leandro Lobato iha PN, Tersa nee (18/04/2023).
Nia dehan, kompete eleisaun nee normal tanba demokrasia, maibe labele hatudu hahalok sira nee ba simbolu nasaun nian, hahalok nee sai preokupasaun ba ema hotu.
Fiar katak, partidu hotu iha responsabilidade atu eduka nia adeptus ka ema sira atu lao iha situasaun neebe hakmatek hodi labele halo situasaun provokadu.
Nunee mos Visi PN, Luis Roberto hatete, konaba ema deskonhesidu hatun Bandeira RDTL iha Munisipiu Likisa nee ema iresponsabilidade, tanba nee husu ba komunidade hotu atu iha kontribuisaun tau matan ba situasaun ida nee, karik haree se mak halo ida nee bele prosesu iha hatoo ba iha polisia, tanba bandeira nee simbolu nasaun.
Xefi Bankada FRETILIN, David Dias Ximenes ‘Mandati’ katak, hahalok nee lamentavel tebes, dala ruma hanoin katak maluk partidu nia elementus balu mak halo. Maibe bele mos lae, tanba ema balu mos la gosta independensia Timor nian, ho nunee sira halo hahalok hanesan nee. “Depoois ita tata malu sira kontenti, ida nee ita haree hela, dala ruma iha ema balu iha intensaun”, katak Mandati.
David apela ba paridu hotu kuidadu ho situasaun sira hanesan nee.
Entretantu, deputadu husi Bankada FRETILIN, Joaquim dos Santos hatete, ho akontesimentu nee dala ruma iha ema balu la gosta komunidade Likisa nia estabilidade, tanba nee halo hahalok sira hanesan nee.
Husu ba parte PNTL atu lalais haree situasaun nee i antisipa, tanba agora iha ambitu kampanha.
(gui)
