DILI, STLNEWS.co – Embaixador Malazia ba Timor Leste, Amarjit Sargit Singh, hasoru Primeiru Ministru (PM) Xanana Gusmão, hodi diskuti programa desentralizasaun iha Timor Leste
Embaixador Malazia, Amarjit Sargit Singh hatoo lia hirak nee ba jornalista sira, hafoin hasoru malu ho PM Xanana Gusmão iha Palasiu Governu, Dili, Segunda (07/08/2023).
Aleinde diskuti konaba programa desentralizasaun, koalia mos konaba relasaun entre nasaun rua neebe iha ona no aproveita oportunidade ida nee atu hato’o mos aspetu kooperasaun sustentável neebé tenki halao entre Malazia ho Timor Leste.
“Iha hasoru malu ho PM Xanana koalia asuntu importante rua, mak konaba desentralizasaun iha Timor-Leste no husu ba Governu Malazia atu haree modalidade no posibilidade formasaun ba funsionáriu públiku atu hatene liu tan konaba aspetu rua nee, inklui aspetu dezenhu no finansas,” katak Embaixador Amarjit Sargit Singh.
Nia senti katak enfasizmu neebe Primeiru-Ministru Xanana husu ba aspetu rua ne’e tenki fokus ba programa desentralizasaun mak komesa diak liu ba IX Governu nian.
Nia hatete, Governu Malazia dezde Timor Leste restaura ninia independensia iha 2002, apoiu ba funsionariu nain 600 partisipa iha formasaun iha Malazia liu husi Programa Kooperasaun Téknika Malazia (MTCP).
“Ami sei kontinua fornese programa formasaun nee no agora ami sei fokus ba aspetu rua nee,” tenik nia.
Iha oportunidade nee, Primeiru-Ministru Xanana Gusmão hakarak Embaixada Malazia iha Timor Leste kontinua sai ponte ligasaun entre governu sira nasaun rua no bele fokus ba area sira neebe nesesidade iha Timor-Leste.
Entretantu, observasaun STL haree katak, hasoru malu entre PM Xanana Gusmão ho Embaxador Malazia, Amarjit Sargit Singh, iha oras tuku 10 liu no remata iha tuku 11 liu.
(gui)
