Embaixador Nain 6 Simu Orientasaun PR Horta

DILI, STLNEWS.co – Prezidente Republika (PR) Jose Ramos Horta fo orientasaun ba embaixador nain 6, neebe foin lalais simu pose, antes halo knaar nudar diplomata.

Bainhira remata hasoru ho PR Horta, Embaixador Filomeno Aleixo da Cruz nudar Embaixador TL Ba Republika Demokratika Popular Laos,  ba jornalista sira iha Palasiu Prezidensial Bairo Pite, Kinta (14/12/2023) hatete, ohin sira mai simu orientasaun husi PR Horta.

“Nai Prezidente konvoka ami atu mai rona orientasaun hanesan xefi  masimu diplomasia Estadu Timor Leste nia, iha kbiit tomak bolu ami mai atu fo saseluk ba rai sira neebe ami simu pose atu halao knaar ba, hodi hatene saida mak estadu nee hakarak no Xefi Estadu hanesan lider masimu, nia hakarak hodi halao iha knaar fatin iha tempu mai,” dehan PR Horta.

Nia hatete, orientasaun neebe Prezidente Republika fo ba embaixador nain 6 labele fo sai ba media sira, Importante mak sira reprezenta Estadu Timor Leste.

“Halao knaar tuir saida mak estadu tula ba ami nia kabaas, la haluha halo kontaktu regular ho Prezidente Republika no ho MNEK, atu nunee iha komunikasaun regular no relatoriu regular,” katak nia.

Nia hatutan, ninia planu prioridade iha Laos mak oras nee hetan ona konvite husi Prezidente Republika nomos Primeiru Ministru katak, fo kontinuasaun ba Adezaun ASEAN, nomos relasaun Bilateral.

Prezidente Republika Jose Ramos Horta husu Embaixador nain 6 hatudu seriedade ho dedikasaun atu halao relasaun ho nasaun neebe Timor Leste nia embaixada koloka ba, embaixador sira tenki koloka prioridade Timor Leste nian atu halao relasaun multilaterais no bilaterais.

Xefi Estadu hatutan, embaixador sira neebe designada ba iha nasaun sira nee reprezenta estadu no governu iha neeba, sira iha kompetensia no didikasaun, seriedade hanesan mos embaixador no embaixadora.

Tuir observasaun neebe STL hetan, embaixador neebe mak foin daudaun simu pose mak hanesan Antonio da Conceição asumi kargu nudar Embaixador Extraodinario e plenipotenciario TL ba Republika Indonezia, nomeia Maria Angela Guterres Viegas Carrascalao nudar Embaixadora TL ba Republika Federativa Brazil, nomea Filomena Aleixo da Cruz nudar Embaixador TL ba Republika Demokratika Popular Laos, nomea Chloe Dindo nudar Embaixador Timor Leste ba Cidade Vatikano, Nomea Dionisio da Costa Babo nudar Embaixador TL Ba Misaun Permanente Nasoens Unidas, Nomea Alex Tilman nudar Embaixador TL ba Republika Singapura.

(eme)

LEAVE A REPLY

Please enter your comment!
Please enter your name here