DILI, STLNEWS.co – Embaixadór Estadus Unidus Amerika (EUA) enkontru ho Prezidente Parlamentu Nasional (PPN), Fernanda Lay, diskuti kooperasaun bilateral iha area defeza, seguransa no dezenvolvimentu.
Hafoin remata enkontru, Embaixadór Estadus Unidus Amerika (EUA) iha Timor-Leste, Thomas Daley hatete, ohi mai enkontru ho PPN, no kongratula nudar primeiru feto PPN iha Timor-Leste. Nunee mos halo diskusaun prioridade governu nian no oinsa Governu Estadus Unidus atu bele halo hodi apoia ba prioridade sira.
“Ami diskuti impaktu husi kooperasaun bilateral, liu-liu area defeza, seguransa no dezenvolvimentu. Diskuti mos impaktu pozitivu neebe USID no korpu da paz halo ona ba dezenvolvimentu iha TL, iha area sosial, ekonomia, kultura no seguransa”, informa Embaixador Estadus Unidus Amerika (EUA) iha Timor-Leste, Thomas Daley, bainhira remata hasoru malu ho PPN iha Gabinete PPN, Kuarta (26/07/2023).
Nia hatete, Mileniu Chalenges Cooperation (MCC) halo programa no tinan kotuk entre mileniu kooperation ho TL asina ona akordu paktu ba deznvolvimentu iha TL.
Ho paktu nee, programa kooperasaun durante tinan 5, tanba nee Estadus Unidus Amerika sei kontribui milhaun US$ 400.020.
No USID sei kontinua prezensa iha nee, durante tinan 20 iha Timor gasta ona osan milhaun US$ 300.020. Nunee mos forsa naval Amerika halo ona sira nia servisu liu husi konstrui eskola sira iha nasaun laran.
Nunee mos sira iha voluntariu korpu da paz iha nain 16, daudaun nee fila hikas mai Timor hafoin sira sai husi Timor tanba Covid-19, maibe sira fila fali mos kontinua halao servisu voluntariu.
Tuir nia, agora sira iha vonluntariu 16, no sira halao hela sira nia knaar, iha area dezenvolvimentu, komunitariu no edukasaun. Too agora MCC sei foku ba area prinsipal 2, hanesan saneamentu ho drainazen no edukasaun. Sira sei konstrui sentru tratamentu ba bee foer, neebe 100% iha Dili, neebe sei servisu ho administrador no lideransa eskola sira, hodi kapasita liu tan profesores sira.
Tanba nee, atu realiza sei asina paktus entra em vigor efetivamente iha tinan oin, durasaun tinan 5, tanba nee iha faze kontratasaun.
(gui)
