DILI, STLNEWS.co – Nain no administrador husi Empreza GM Milatos Lda, George Milatos informa, sira iha planu sei halo investimentu fabrika ida iha Likisa, hodi halo produsaun ba material konstrusaun uma nian.
Hafoin remata enkontru ho Primeiru Ministru, Taur Matan Ruak, administrador husi Empreza GM Milatos, Lda nee hatete, investimentu fabrika nee sei foku liu ba produs besi sira neebe mak Timor Leste (TL) presiza, liu-liu konaba material konstrusaun uma nian.
“Ohin ami konvoka enkontru ida ho Primeiru Ministru atu diskuti konaba ami nia ideias ka planu balu neebe iha fulan hirak ba kotuk ami trasa ona, neebe ami atu mai halo investimentu iha TL, liu-liu iha area fabrika, i ami nia fabrika nee konaba produs besi sira neebe mak presiza iha TL, liu-liu konaba material konstrusaun uma ninian, i ami halo negosiu nee atu harii fatin nee iha Likisa neebe mak labele dook husi Airoportu Dili,” dehan George iha rezidensia ofisial Primeiru Ministru, Taur Matan Ruak, Farol, Dili, Tersa nee (02/08/2022).
Nain ba Kompanhia GM nee hatutan, tipu ba produsaun besi nee iha oin tolu neebe mak sei halo iha TL no provavelmente sei presiza gastus ka fundus nee iha US$ 3 millaun, no kompahia nee sei mai husi Australia.
(san)
