DILI, STLNEWS.co – Empreza Zamancartel International Investment – LTD husi Malazia apoia pakote alimentasaun ba Prezidensia Republika, hodi haforsa programa sosial atu tulun família vulneravel iha terenu.
Iha biban nee, Prezidente Republika Jose Ramos Horta ba jornalista sira iha Palasiu Prezidente Bairu Pite Kinta nee (16/03/2023) hatete, empreza nee husi grupu boot ida neebe eziste iha Timor Leste, no iha biban nee Prezidente mos hasoru sira.
“Nee grupu boot ida husi Malazia no grupu nee eziste mos iha Europa. Hau hasoru sira, sira hakarak halo investimentu oin-oin ba Timor-Leste. Agora sira apoiu daudaun ona Pezidensia Republika nia programa apoiu umanitaria (sosiál), hahu ho tulun fos, hahan iha kalen (lata), sira sei fo mos osan oituan atu ajuda programa sira nee,” esplika Prezidente Republika, José Ramos-Horta.
Prezidente Republika hatete, ajensia internasional, empreza no inividu balun mos hatudu sira nia disponibilidade hodi tulun programa apoiu sosial.
“Hau koalia daudaun ona ho Koreia Sul atu haruka komputador, neebe oras nee sira organiza ona, inklui programa multivitamina ba labarik sira nia saude. Tanba nee, tempu badak programa prezidensia nian sei aumenta atu ajuda kosok oan sira, família vulnerável,’’ informa Prezidente Repúblika.
Ba Xefi Estadu, programa sosial nee responsabilidade governu nian, maibe Prezidensia Republika buka tulun governu liu husi mobiliza apoiu internasional, setor privadu iha rai laran atu kontinua apoia komunidade iha baze.
Reprezentante Grupu Zamancartel International Investment LTD, Intan Safinar M. Safri fiar katak, apoiu nee sei distribui ba família vulneravel.
“Ohin ita halo doasaun fos mai Prezidensia Republika atu kontinua tulun família vulneravel inklui labarik sira, no daudaun nee ita prosesa apoiu hanesan fos no hahan vitamina balun no sei too Timor-Leste iha tempu badak, apoiu nee sei kontinua fazeadamente ba Prezidensia Republika, espera katak povu Timor-Leste bele simu,’’ tenik Intan Safinar.
Inisiativa nee atu apoia labarik sira nia nutrisaun, hodi haforsa dezenvolvimentu labarik sira nia futuru.
Ba faze dahuluk, empreza husi Malazia apoia fos saka 100 no pakote alimentasaun seluk, hodi distribui ba komunidade vulneravel iha Munisípiu Díli.
Grupu Emprezarial nee halo hela levantamentu nesesidade konaba modelu investimentu neebe atu loke iha Timor-Leste, hodi emprega Timor oan sira liu-liu kriasaun industria “mie instant” no ai haan nutritivu, hodi atende nesesidade merkadu no haforsa dezenvolvimentu nasional.
(eme)
