DILI, STLNEWS.co – Ministru Agrikultura no Peska (MAP) entrega servisu no programa kontinuasaun ba iha ministru foun ho nia Sekretariu Estadu.
Ba jornalista sira Segunda nee (03/07/2023), eis Ministru Agrikultura Pedro dos Reis hateten, politika mak nunee, governu ida tun, ida mai fali, tan nee governu bele troka malu, maibe objetivu ho misaun ida deit, mak atu dezenvolve setor agrikultura iha TL ba oin.
“Ohin ami entrega hela relatoriu ba Ministru no Sekretariu Estadu foun sira. Iha relatoriu nee programa balun lao ona ho susesu no balun seidauk, tanba mee husu ba governu foun atu kontinua,” dehan eis Ministru Agrikultura no Peska, Pedro dos Reis, bainhira entrega knaar ba iha Ministru foun.
Nia afirma, hanesan Ministru sesante nafatin apoiu servisu iha Ministeriu ida nee, maski la ukun ona, maibe hanesan Timor oan prontu koopera no servisu hamutuk hodi dezenvolve Ministeriu ida nee sai diak liu tan ba povu no nasaun TL.
Pedro katak, durante nia mandatu halo ona servisu barak, maibe atu dehan progresu diak ka la diak, husik ba povu sira mak sai sasin no rezultadu sira nee tau hotu ona iha relatoriu, neebe entrega ona ba Ministru foun.
Iha fatin hanesan, Ministru Agrikultura no Peska, Marcus da Crus hateten, governu foun sei kontinua ho planu neebe trasa ona, maibe atu atinji objetivu ho metas neebe iha, mak Ministru mesak sei la halo buat ida, tan nee presiza servisu hamutuk entre Ministru, Sekretariu Estadu, funsionariu sira nomos parseiru dezenvolvimentu sira nia tulun, atu nunee bele dudu setor nee lao ba oin ho diak iha futuru mai.
“Hau hatoo agradese ba Ministru sesante neebe halo ona servisu barak, no nia progresu mak ita haree ona, tanba nee ami sei kontinua, importante lori setor agrikultura, peska no floresta nee lao ba oin, atualkansa objetivu, ita tenki servisu hamutuk,” dehan Ministru Agrikultura.
(mad)
