DILI, STLNEWS.co – Hafoin fahe malu iha Governasaun VIII ka Governasaun Aliansa Maioria Parlamentar (AMP), ohin Primeiru Ministru Taur Matan Ruak ho Lider Karismatiku Xanana Gusmão hasoru hikas malu hamnasa hodi halao enkontru ho Prezidente Repúblika José Ramos Horta.
Tuir observasaun STL, Sesta nee (30/06/2023), iha Palasiu Prezidente Bairu Pite, ohin Líder Karismastiku Xanana Gusmão hanesan Prezidente Partidu CNRT ho Primeiru Ministru (PM) Taur Matan Ruak, hasoru malu no hakuak hikas malu hodi hasoru PR José Ramos Horta.
Maski laiha ajenda entre Lider Karismatiku Xanana Gusmão hasoru PR, tanba ajenda neebe iha Primeiru Ministru Taur Matan ruak mak hasoru prezidente.
Iha intervista, PM indizitadu Xanana Gusmão hatete, “hau moris mai nunka haree Taur”, katak Xanana.
Nunee PM Taur Matan Ruak hatete, “jauh di mata dekat di hati”.
Entretantu, Primeiru Ministru Taur Matan Ruak too iha Palasiu Prezidente, iha tuku 8.30, no kontinua halo enkontru ho Prezidente Republika iha minutu balun, Prezidente Partidu CNRT too antes, PR ho PM halo ona enkontru.
Prezidente Partidu CNRT hein iha sala espera iha minutu balun Prezidente Republika ho Primeiru Ministru sai hodi hasoru Xanana Gusmão iha sala espera.
Bainhira sai husi sala espera Xanana ho Taur hakuak malu ho oin midar iha Prezidente Republika nia oin no kontinua halo enkontru hamutuk.
Bainhira sai husi enkontru, Primeiru Ministru ho Prezidente Partidu CNRT akompanha husi prezidente mai halo intervista ho jornalista sira.
Depois fila, Xanana sai husi oin no PM Taur ho PR sai husi kotuk.
(gui)
