Familia Lobato Sakrifika Makaas Ba Luta

LIKISA, STLNEWS.co – Prezidente Republika (PR) Jose Ramos Horta hatete, familia Lobato sakrifika aan ba luta libertasaun nasional too Timor Leste hetan ukun rasik aan.

Prezidente Republika Jose Ramos Horta hatoo lia hirak nee liu husi diskursu, bainhira partisipa serimonia funebre saudozu Luis Lobato iha Munisipiu Likisa, Suku Leorema, Kinta (22/06/2023).

PR Horta hatete, laiha familia ida barak mak terus liu familia Lobato iha funu laran, hahu husi tinan 1975, laiha família ida mak sakrifika aan ba luta hanesan família Lobato.

“Hau hanesan Xefi Estadu mai iha nee tanba família Lobato neebe halo sakrifisiu no sai vitima oin-oin hahu iha 1975 ho Nicolao Lobato no laiha família iha Timor Leste sakrifika aan ba luta hanesan família Lobato,” dehan PR Horta.

Iha biban nee, Prezidente Republika mos partisipa iha prosesu funebre saudozu Luis Lobato, tanba nia kontribuisaun mos makaas ba Timor Leste, nia indepedensia hanesan mos familia Lobato.

Prezidente dehan, Timor Leste lakon ema potensial nain rua hanesan saudoza Isabel da Costa Ferreira nomos saudozu Luis Lobato, tanba nee nia rasik kansela nia viajen ba iha Fransa hakarak partisipa iha serimonia funebre matebian nain rua.

Depois de haloot maktoban saudozu ba deskansa ikus nian, Xefi Estadu entrega bandeira nasional ba oan mane husi matebian Saudozu Luis Lobato hanesan rekonhesimentu ba saudozu nia kontribuisaun ba povu no ba Timor-Leste.

Iha serimonia haloot matebian hanesan despedida ikus ho familia, tristeza neebe mak hafalun família Lobato iha serimonia despedida ikus nian iha Semiteriu Gredilau Leorema.

Serimonia funebre nee partisipa mos husi Prezidente Republika Jose Ramos Horta, membru governu, sosiedade sivil, militar, familia amigu husi matebian rasik.

(eme)

LEAVE A REPLY

Please enter your comment!
Please enter your name here